ངོ་འཕྲད་བདེ་བའི་དྲ་འབྲེལ།

བསམ་ཡས་ཆོས་སྒོ་ཕྱེ་ནས་ཉིན་༣་གྱི་རྗེས་སུ་བསྐྱར་དུ་སྒོ་བརྒྱབ་པ།


ཐད་ཀར་ཕབ་ལེན་གྱི་དྲ་འབྲེལ།

༄༅།། རྒྱ་ནག་གཞུང་གིས་བོད་རང་སྐྱོང་ལྗོངས་སུ་ཏོག་དབྱིབས་ནད་དུག་སྔོན་འགོག་ཆེད་དུ་ཟླ་བ་གཅིག་ཙམ་རིང་ལ་ཕྱི་ནང་གི་འགྲོ་འོང་བཀག་སྟེ་དགོན་སྡེ་ཁག་གི་ཆོས་སྒོ་བརྒྱབ། ཕྱི་ཟླ་༣་པའི་ཚེས་༣༠་ཉིན་ལྷ་ས་གྲོང་ཁྱེར་ནང་བསྟན་མཐུན་ཚོགས་གྱིས་བརྡ་ཁྱབ་བཏང་སྟེ་ཐག་རིང་གི་ཆོས་ལུགས་བྱེད་སྒོ་སྤེལ་ཡུལ་༢༡༤་ཕྱི་ཟླ་༣ ཚེས་༣༡་ནས་སྒོ་འབྱེད་རྒྱུའི་གཏན་ཁེལ་བྱས་པ་ཡིན་ཞེས་ཁྱབ་བསྒྲགས་བྱས་པ་ལྟར་དུས་རབས་བརྒྱད་པར་བཙན་པོ་ཁྲི་སྲོང་ལྡེའུ་བཙན་སྐབས་སུ་བཞེངས་པའི་བོད་བརྒྱུད་ནང་བསྟན་གྱི་དགོན་པའི་ཐོག་མ་བསམ་ཡས་དགོན་པའང་བསྐྱར་དུ་ཆོས་སྒོ་ཕྱེ། ཉིན་གསུམ་ལ་ཆོས་སྒོ་ཕྱེ་ནས་དད་ལྡན་མང་ཚོགས་རྣམས་མཆོད་མཇལ་ལ་བཏང་ཡོད་ཀྱང་ཕྱི་ཟླ་བཞི་པའི་ཚེས་༡༤་ཉིན་གློ་བུར་དུ་དགོན་པའི་ལས་ཤོག་ཐོག་ཏུ་བཀོད་ཁྱབ་ཞིག་སྤེལ་ཏེ་ཕྱི་ཚེས་༡༤་ནས་ཆོས་སྒོ་རྒྱག་རྒྱུ་ཡིན་ཞེས་བཀོད་ཡོད་པ་རེད།

ལྷོ་ཁ་སྣེ་གདོང་རྫོང་ཁོངས་སུ་ཆགས་པའི་གཡའ་བཟང་བཀའ་བརྒྱུད་ཀྱི་ཆོས་སྡེ་ཆེན་པོ་གཡའ་བཟང་དགོན་པའང་ཕྱི་ཚེས་༡༥་ཉིན་གློ་བུར་དུ་ཆོས་སྒོ་རྒྱག་དགོས་པའི་བཀོད་ཁྱབ་བཏང་སྟེ་ཆོས་སྒོ་བརྒྱབ་འདུག མིང་འདོན་བྱེད་འདོད་མེད་པའི་འབྲེལ་ཡོད་ས་གནས་ཀྱི་བོད་པ་ཞིག་གིས་ཁུངས་ལྡན་གནས་ཚུལ་འདི་གར་འགྲེལ་བརྗོད་བྱས་པ་ལྟར་ན། བསམ་ཡས་དང་གཡའ་བཟང་དགོན་པ་གཉིས་ཀྱིས་སྤེལ་བའི་བཀོད་ཁྱབ་ནང་དུ་དགོན་པ་སྒོ་རྒྱག་དགོས་དོན་གོང་རིམ་གྱི་བརྡ་ཐོ་དང་ཏོག་དབྱིབས་ནད་དུག་གི་གློ་ཚད་འགོག་བཅོས་ཀྱི་ལས་ཀའི་དགོས་མཁོ་གཞིར་བཟུང་གིས་ཆོས་སྒོ་རྒྱག་རྒྱུ་ཡིན་ཚུལ་འཁོད་འདུག འོན་ཀྱང་ཏོག་དབྱིབས་ནད་དུག་ནི་ཁ་གཡར་ས་ཙམ་ལས་དོན་དངོས་སུ་རྒྱུ་རྐྱེན་གཞན་ཞིག་ཡིན་སྲིད་ཅེས་བོད་པ་མང་པོ་ཞིག་གིས་གླེང་སློང་བྱེད་བཞིན་ཡོད་པའི་གནས་ཚུལ་ཐོན་འདུག

གོང་གསལ་དགོན་པ་ཁག་སྒོ་རྒྱག་རྒྱུའི་བཀོད་ཁྱབ་ལ་ཕྱི་ཚེས་༡༤་ནས་དགོན་པ་སྒོ་རྒྱག་རྒྱུ་ཡིན་ཚུལ་བཀོད་ཀྱང་དུས་ནམ་ཞིག་དགོན་པ་དེ་དག་བསྐྱར་དུ་སྒོ་འབྱེད་རྒྱུ་ཡིན་མིན་གྱི་དུས་ཚོད་བཀོད་མི་འདུག ད་དུང་ཟླ་བ་འདིའི་ཕྱི་ཚེས་༡༤་ནས་ལྷ་ས་གྲོང་ཁྱེར་ཕྱི་ནང་གི་ཉེན་རྟོག་པ་རྣམས་ཉིན་༧་ལ་གུང་སེང་བཏང་སྟེ་གདན་ས་སེ་འབྲས་དགེ་གསུམ་སོགས་ཉེ་འཁོར་གྱི་དགོན་སྡེ་ཁག་གི་དགེ་འདུན་པ་གཅིག་ཀྱང་ཕྱི་ལ་ཕེབས་མི་ཆོག་པའི་བཙན་བཀའ་བཏང་ཡོད་འདུག

སྤྱིར་བོད་རང་སྐྱོང་ལྗོངས་ནང་བསྟན་མཐུན་ཚོགས་ཀྱིས་ཕྱི་ཟླ་༣ ཚེས་༣༠་ཉིན་བརྡ་ཁྱབ་བཏང་སྟེ་སྔོན་ལ་ལྷ་ས་གྲོང་ཁྱེར་ནས་ཐག་རིང་དུ་ཡོད་པའི་ཆོས་ལུགས་བྱེད་སྒོ་སྤེལ་ཡུལ་ཁག་༢༡༤་ཕྱི་ཟླ་༣་ཚེས་༣༡་ཉིན་བསྐྱར་དུ་སྒོ་འབྱེད་གཏན་ཁེལ་བ་དང་། དེ་ནས་རིམ་བཞིན་རྫོང་དང་གྲོང་རྡལ། གྲོང་ཁྱེར་བཅས་ལ་རཆོས་སྒོ་འབྱེད་རྒྱུ་ཡིན་ཚུལ་བཀོད་ཡོད་པ་རེད། ད་ལྟ་བོད་ནང་ཁུལ་དུ་འགྲོ་འོང་བཀག་སྡོམ་ཕྱི་འཐེན་བྱས་ནས་ཚོང་ཁང་དང་ཟ་ཁང་རྣམས་བསྐྱར་དུ་སྒོ་ཕྱེ་སྟེ་རྒྱུན་ལྡན་གྱི་འཚོ་བ་སླར་གསོ་བྱུང་མོད། འོན་ཀྱང་གདན་ས་སེ་འབྲས་དགེ་གསུམ་དང་ཕོ་བྲང་པོ་ཏ་ལ། ལྷ་ལྡན་གཙུག་ལག་ཁང་བཅས་གྲོང་ཁྱེར་ནང་གི་དགོན་པ་གཅིག་ཀྱང་ཆོས་སྒོ་ཕྱེ་མེད་ཅིང་། ལྷ་སའི་བར་སྐོར་ཡང་ད་དུང་སྒོ་བརྒྱབ་ཡོད་པའི་འགྲེལ་བརྗོད་གནང་སོང་བ་སོགས་ཀྱི་སྐོར། རྒྱ་གར་ལྷོ་ཕྱོགས་ནས་ཨ་རིའི་རླུང་འཕྲིན ཁང་གི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

XS
SM
MD
LG