ངོ་འཕྲད་བདེ་བའི་དྲ་འབྲེལ།

གྲྭ་བཙུན་ཚོར་བསམ་བློའི་སློབ་གསོ་བཏང་རྗེས་དགོན་པར་ཕྱིར་སློག


༄༅།། ཉེ་ཆར་སྤྱི་ཟླ་༦་པའི་ཚེས་༣༠་ཉིན་བོད་ནང་གི་ཡུལ་ཤུལ་ཁུལ་གྱི་ཉ་མཚོ་ཟིལ་དཀར་དགོན་དང་མདོ་སྔགས་སྐལ་བཟང་ཆོས་འཁོར་གླིང་གི་གྲྭ་བཙུན་ལོ་ན་༡༨་ལ་མ་སོན་པ་རྣམས་རྫོང་ཐོག་ཏུ་འབོད་འགུགས་ཀྱིས་རྒྱ་གཞུང་གི་སློབ་གསོ་སྤྲོད་བཞིན་པ་མཚམས་བཞག་སྟེ་གྲྭ་བཙུན་རྣམས་རང་དགོན་དུ་ཕྱིར་སློག་ཡོད་པའི་གནས་ཚུལ་ཐོན་འདུག དེ་ཡང་མིང་བརྗོད་འདོད་མེད་པའི་གནས་ཚུལ་མཁོ་སྤྲོད་པ་ཞིག་གིས་འདི་ག་རླུང་འཕྲིན་ཁང་ལ་བརྗོད་དོན་ལྟར་ན། སྤྱི་ཟླ་༨་པའི་ཚེས་༩་དང་༡༠་གཉིས་ལ་རྒྱ་གཞུང་གིས་ཆབ་སྲིད་ཀྱི་བསམ་བློའི་སློབ་གསོ་སྤྲོད་བཞིན་པའི་གྲྭ་པ་དང་བཙུན་མ་རྣམས་རང་དགོན་སོ་སོར་ཕྱིར་ལོག་བྱེད་དུ་བཅུག་ཡོད་ཅིང་། ཁོ་ཚོ་རྫོང་ཐོག་ཏུ་བཀག་ནས་སློབ་གསོ་སྤྲད་པའི་རིང་དེར་སྐྱ་ཆས་གྱོན་དགོས་བྱུང་འདུག གཙོ་བོ་ཉིན་ལྟར་རྒྱ་གཞུང་གི་འཆར་གཞི་དང་བཀོད་སྒྲིག་བྱེད་ཡོད་པའི་སློབ་ཐུན་ཚང་མར་མཉན་དགོས་བ་དང་བཟའ་འཐུང་སོགས་ལ་དཀའ་ངལ་ཆེན་པོ་ཕྲད་མེད་པ་འདྲ། ད་ལྟ་གནས་སྐབས་རིང་རྒྱ་གཞུང་གི་སྲིད་ཇུས་དེ་ཉིད་མཚམས་འཇོག་བྱས་ཟིན་པའི་རྣམ་པ་ཞིག་འདུག་ཅེས་བཤད།།

འདི་གའི་གསར་འགོད་པར་གནས་ཚུལ་མཁོ་སྤྲོད་པའི་མུ་འཐད་དུ་བརྗོད་དོན་ལྟར་ན་། དེ་སྔ་ཏོག་དབྱིབས་ནད་དུག་གི་སྟབས་ཀྱིས་དགོན་པའི་ཚོགས་ཆོས་ར་དང་དགེ་འདུན་འདུས་མང་གདན་གཅིག་ཏུ་འཛོམས་ནས་ཞབས་རིམ་སྒྲུབ་པ་སོགས་བཀག་འགོག་བྱས་པ་རེད། ད་ལྟ་ས་གནས་སོ་སོའི་བོད་ཀྱི་དགོན་སྡེ་ཁག་ཏུ་ཆོས་ལུགས་ཀྱི་བྱེད་སྒོ་ཁག་དང་ཚོགས་ཆོས་ར་འཚོགས་རྒྱུ་བཅས་ལ་བཀག་འགོག་གང་ཡང་མེད་པར་དངོས་སུ་ལྷོད་ཡངས་ཤིག་བཏང་འདུག མི་ཚོགས་འདུ་འཛོམས་ཆེ་སར་འགྲོ་བའི་སྐབས་སུའང་ཁ་རས་གྱོན་མཁན་ཇེ་ཉུང་དུ་སོང་འདུག་ཅེས་བཤད།།

འདི་དང་དུས་མཚུངས་སུ་ཟླ་སྔོན་མར་བོད་ནང་གི་དཀར་མཛེས་ཕྱོགས་ཀྱི་དགོན་སྡེ་ཁག་གི་གྲྭ་བཙུན་ལོ་ན་༡༨་མ་སོན་པ་རྣམས་སློབ་གྲྭར་འགྲིམ་དགོས་པར་མ་ཟད། ཁོ་ཚོས་གྲྭ་ཆས་ཀྱང་གྱོན་མི་ཆོག་པའི་དཀའ་ངལ་འཕྲད་བཞིན་པའི་གནས་ཚུལ་ཐོན། འདི་ལ་རྒྱུས་ལོན་བྱུང་བ་ལྟར་ན་ད་དུང་མུ་འཐད་དུ་རྒྱ་ནག་གི་བཀའ་རྒྱའི་འོག་གྲྭ་ཆས་གྱོན་མ་བཅུག་པར་སློབ་གསོ་མྱོང་བཞིན་ཡོད་པའི་སྐོར། བལ་ཡུལ་ནས་འདི་གའི་གསར་འགོད་པ་ཀུན་བཟང་བསྟན་འཛིན་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

ཐད་ཀར་ཕབ་ལེན་གྱི་དྲ་འབྲེལ།


XS
SM
MD
LG