ངོ་འཕྲད་བདེ་བའི་དྲ་འབྲེལ།

གཟའ་མིག་དམར། ༢༠༢༤/༠༣/༡༩

གྷོ་བ་གཙུག་ལག་སློབ་གྲྭ་དང་འབྲས་སྤུངས་བློ་གླིང་ཤེས་ཡོན་བརྗེ་ལེན།


༄༅།། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་བཀའ་དགོངས་ལམ་སྟོན་བཞིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་སུ་རྟེན་གཞི་བྱས་པའི་འབྲས་སྤུངས་བློ་གསལ་གླིང་གྲྭ་ཚང་དང་གྷོ་བ་གཙུག་ལག་སློབ་གཉེར་ཁང་གིས་ཕྱི་ལོ་༢༠༡༨་ནས་ཤེས་ཡོན་བརྗེ་ལེན་གྱི་ལས་གཞི་སྤེལ་འགོ་ཚུགས། ན་ནིང་༢༠༡༩་ལོའི་ཕྱི་ཟླ་༡༢་པའི་ཚེས་༡༢ ཉིན་༧གོང་ས་སྐྱབས་མགོན་ཆེན་པོ་མཆོག་མོན་གྷོ་འདོད་རྒུ་གླིང་དུ་ཞབས་སོར་འཁོད་པའི་སྐབས་སུ་འབྲས་སྤུངས་ཚོགས་ཆེན་དུ་ཕེབས་བསུའི་མཛད་སྒོར་བློ་གསལ་གླིང་གྲྭ་ཚང་དང་གྷོ་བ་གཙུག་ལག་སློབ་གཉེར་ཁང་གི་ཤེས་ཡོན་བརྗེ་ལེན་གྱི་ལས་གཞིར་བསྔགས་བརྗོད་དང་ལས་གཞི་རྒྱུན་འཁྱོངས་དང་རྒྱ་བསྐྱེད་དགོས་པའི་བཀའ་སློབ་གནང་ཡོད་པ་རེད།།

ད་ལོ་ཏོག་དབྱིབས་རིམས་ནད་ཀྱིས་ཕན་ཚུན་འགྲོ་འོང་གི་འབྲེལ་ལམ་ཆད་པས་གྷོ་བ་གཙུག་ལག་སློབ་གཉེར་ཁང་གི་སློབ་ཕྲུག་མང་པོར་སེམས་ཁམས་ཀྱི་དཀའ་ངལ་འཕྲད་བཞིན་པའི་སྐབས་འདིར་རང་སྲོག་གཅོད་མཁན་འགའ་ཞིག་བྱུང་ཡོད་ཅིང་། དེར་བརྟེན་སློབ་གྲྭའི་ཉེ་བའི་རིག་བདག་གིས་འབྲས་སྤུངས་བློ་གསལ་གླིང་གྲྭ་ཚང་གི་མཁན་རིན་པོ་ཆེར་འབོད་སྐུལ་ཞུས་དོན་བཞིན་བློ་གསལ་གླིང་གྲྭ་ཚང་གིས་ཕྱི་ཟླ་བརྒྱད་པའི་ཚེས་༡༦་ནས་འགོ་འཛུགས་ཀྱིས་དུས་ཡུན་ཟླ་བ་གཅིག་ལ་བདུན་ཕྲག་རེའི་རེས་གཟའ་ལྷག་པ་ནམ་ཡིན་ལ་དགེ་ལས་སློབ་ཕྲུག་ཚོར་སྒོམ་གྱི་སྐོར་དྲྭ་ལམ་དུ་སློབ་ཁྲིད་གནང་རྒྱུ་མགོ་བརྩམས། སློབ་ཕྲུག་དང་དགེ་རྒན་སོགས་མི་ཁྲི་གཉིས་ལྷག་སྒོམ་སྒྲུབ་ལ་མཉམ་ཞུགས་བྱས་ནས་ཕན་ཐོགས་ཆེན་པོ་བྱུང་ཡོད་པར་མ་ཟད། ད་དུང་དོན་གཉེར་ཅན་གཞན་ལའང་རིན་མེད་དུ་ལྟ་ཉན་བྱེད་པའི་གོ་སྐབས་ཕུལ་ཡོད་ཅེས་འབྲས་སྤུངས་བློ་གསལ་གླིང་གྲྭ་ཚང་གི་མཁན་རིན་པོ་ཆེ་བློ་བཟང་བསམ་གཏན་གྱིས་འདི་གར་འགྲེལ་བརྗོད་གནང་བྱུང་།།

དུས་ཡུན་ཟླ་བ་གཅིག་ལ་འབྲས་སྤུངས་བློ་གསལ་གླིང་གྲྭ་ཚང་གི་དགེ་བཤེས་དར་དོ་དང་དགེ་བཤེས་རིན་ཆེན་དབང་རྒྱལ་རྣམ་གཉིས་ཀྱིས་དྲན་པ་ཉེར་བཞག་དང་དབུགས་འབྱིན་རྔུབ། གཞི་གནས་དང་ལྷག་མཐོང་། སྙིང་རྗེས་བཅས་པ་དབྱིན་སྐད་དུ་སློབ་ཁྲིད་གནང་སྟེ་ནང་པའི་སེམས་ཁམས་རིག་པ་དང་སྒོམ་གྱི་སློབ་ཁྲིད་ལ་གྷོ་བ་གཙུག་ལག་སློབ་གྲྭའི་དགེ་རྒན་དང་སློབ་ཕྲུག་ཚོས་དོ་སྣང་ཆེན་པོ་བྱེད་བཞིན་ཡོད་ཅིང་། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་་མགོན་ཆེན་པོ་མཆོག་གིས་དུས་ཡུན་རིང་པོའི་སྔོན་ནས་གང་གི་ཐུགས་བསྐྱེད་དམ་བཅའ་བཞི་རྩ་འཛིན་གྱིས་དེང་དུས་ཀྱི་འཛམ་གླིང་འདིར་དགོས་མཁོ་ཆེ་བའི་རྒྱ་གར་གྱི་གནའ་བོའི་དཔལ་ལེནྡྲའི་སྲོལ་རྒྱུན་ཤེས་ཡོན་གྱི་ལེགས་བཤད་རྣམས་རྒྱ་གར་ལ་སླར་གསོ་ཡོང་ཐབས་དང་དེང་རབས་ཀྱི་ཤེས་ཡོན་སློབ་གསོར་སྲོལ་རྒྱུན་གྱི་ཡ་རབས་བཟང་སྤྱོད་ཀྱི་ཤེས་ཡོན་སློབ་གསོ་ཚུད་དགོས་རྒྱུ་གལ་ཆེར་གཟིགས་ཏེ་ནང་པའི་ཚད་མ་རིག་པ་དང་སེམས་ཁམས་རིག་པའི་རྣམ་གཞག་རྣམས་རྒྱ་གར་གྱི་གཙུག་ལག་སློབ་གྲྭ་ཁག་ཏུ་ཁྱབ་སྤེལ་དགོས་པ། བོད་པའི་གདན་ས་དང་གྲྭ་ཚང་ཁག་གིས་དམིགས་བསལ་གྱི་འགན་ཁུར་བཞེས་ཏེ་རྒྱ་གར་གྱི་གཙུག་ལག་སློབ་གྲྭ་ཁག་ལ་ཤེས་ཡོན་བརྗེ་ལེན་གྱི་འབྲེལ་ལམ་འཛུགས་ཐུབ་ན་དགེ་མཚན་ཡོད་པའི་ལམ་སྟོན་རིམ་པ་ཞིག་ཕེབས།།

དེའི་བྲས་བུར་ཕྱི་ལོ་༢༠༡༠་ཡི་ལོ་མཇུག་ཏུ་རྒྱ་གར་ལྷོ་ཕྱོགས་ཀར་ན་ཀྲ་ཀ་མངའ་སྡེའི་སྦེང་ལོར་གྲོང་ཁྱེར་དུ་རྟེན་གཞི་བྱས་པའི་ཏུམ་ཀུར་གཙུག་ལག་སློབ་གཉེར་ཁང་དང་སེར་བྱེས་ནང་བསྟན་གཙུག་ལག་སློབ་གཉེར་ཁང་ཆེན་མོས་ཐོག་མར་ཤེས་ཡོན་བརྗེ་ལེན་གྱི་གན་རྒྱ་བཞག ད་ལྟའི་བར་དུ་ཤེས་ཡོན་བརྗེ་ལེན་གྱི་ལས་གཞི་སྤེལ་ཡོད་པ་དང་ཕྱོགས་མཚུངས་ཕྱི་ལོ་༢༠༡༨་ལོར་འབྲས་སྤུངས་བློ་གསལ་གླིང་གྲྭ་ཚང་དང་གྷོ་བ་གཙུག་ལག་སློབ་གཉེར་ཁང་ཁག་གིས་ཀྱང་ཤེས་ཡོན་བརྗེ་ལེན་གྱི་གན་རྒྱ་བཞག་སྟེ་ལས་གཞི་མང་དག་ཅིག་སྤེལ་བ་ཡོད། དཔེར་ན་སྔ་ལོ་བདུན་ཕྲག་གཉིས་རིང་ལ་གྷོ་བ་གཙུག་ལག་སློབ་ཁང་གི་དགེ་རྒན་དང་སློབ་ཕྲུག་༤༥་ལ་བློ་གསལ་གླིང་དུ་ནང་པའི་སེམས་ཁམས་རིག་པའི་ཟབ་སྦྱོང་སྤྲད་ཡོད་པའི་སྐོར་ཀྱི་སྐོར། རྒྱ་གར་ལྷོ་ཕྱོགས་ནས་འདི་གའི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

ཐད་ཀར་ཕབ་ལེན་གྱི་དྲ་འབྲེལ།


XS
SM
MD
LG