དགེ་ལུཊ་པའི་གདན་ས་ཁག་ཏུ་འོས་བསྡུའི་དྲིལ་བསྒྲཊ་སྤེལ་མི་ཆོག་པ།

༄༅།། རྒྱ་གར་དུ་གཞིས་ཚུགས་པའི་བྱེས་ཀྱི་གདན་ས་གསུམ་གཙོས་དགེ་ལུགས་པའི་ཆོས་སྡེ་དང་བཤད་གྲྭ་ཁག་ཏུ་འོས་བསྡུའི་སྐབས་སུ་འོས་མི་དང་དེ་དག་གི་རྒྱབ་སྐྱོར་པ་ཚོས་འོས་བསྡུའི་དྲིལ་བསྒྲགས་ལས་འགུལ་སྤེལ་མི་ཆོག་ཅིང་། འོས་བསྡུ་ལ་དམིགས་པའི་དགེ་འདུན་པའི་ཀུན་སྤྱོད་ཀྱི་ལམ་སྟོན་དོན་ཚན་དགུ་གསལ་བསྒྲགས་སྤེལ་འདུག དེ་ཡང་རེས་གཟའ་པ་སངས་ཉིན་རྒྱལ་སྤྱིའི་དགེ་ལྡན་ལྷན་ཚོགས་ཀྱིས་དགེ་ལུགས་པའི་གདན་ས་གསུམ་གཙོས་ཆོས་སྡེ་ཁག་ལ་གསལ་བསྒྲགས་ཡིག་ཆ་ཞིག་བཀྲམ་ཡོད་པར་འཁོད་དོན་ལྟར་ན། ༢༠༢༡་ལོའི་སྲིད་སྐྱོང་དང་བོད་མི་དམངས་སྤྱི་འཐུས་སྐབས་༡༧་པའི་འོས་བསྡུའི་སྐབས་སུ་དགོན་པའི་ཁོར་ཡུག་ཏུ་ཁྱབ་བསྒྲགས་དང་འཕྲེད་དར། སྦྱར་ཡིག་སོགས་སྦྱར་འགེལ་བྱེད་མི་ཆོག་པར་མ་ཟད། དགོན་པའི་མཁར་དངོས་སོགས་ཀྱང་བེད་སྤྱོད་གཏང་མི་ཆོག་ཅེས་ཐག་གཅོད་བྱས་ནས་ལམ་སྟོན་དོན་ཚན་དགུ་བཀྲམ་འདུག

རྒྱལ་སྤྱིའི་དགེ་ལྡན་ལྷན་ཚོགས་ཀྱིས་ལམ་སྟོན་འདི་ནི་ཐེངས་དང་པོ་ཡིན་ཞིང་། འདས་པའི་ལོ་ཤས་རིང་བོད་པའི་འོས་བསྡུའི་དུས་སུ་གྲྭ་བཙུན་གྱིས་ཀུན་སྤྱོད་བསྟེན་སྟངས་ཡག་པོ་མ་བྱུང་བའི་རྐྱེན་གྱིས་༧གོང་ས་སྐྱབས་མགོན་ཆེན་པོ་མཆོག་ལ་ཐུགས་འཚབ་དང་ཐུགས་ཕམ་གྱི་གནས་ཚུལ་བྱུང་ཡོད་པས་དགེ་ལྡན་ལྷན་ཚོགས་ཀྱི་ཚོགས་ཁོངས་མཁན་རིན་པོ་ཆེ་རྣམ་པས་གཞེན་སྐུལ་གནང་སྟེ་འགྱུར་བ་བཏང་བ་ཞིག་རེད་ཅེས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་འཛིན་སྐྱོང་ངེས་སྟོན་པ་མཁན་ཟུར་བྱང་ཆུབ་ཆོས་ལྡན་གྱིས་འགྲེལ་བརྗོད་གནང་སོང་། ཁོང་གིས་ཐག་གཅོད་འདི་རི་བོ་དགེ་ལྡན་པའི་ཆོས་སྡེ་སྤྱི་ལ་ཁྱབ་པའི་བཅའ་ཡིག་ཆེན་མོའི་དོན་ཚན་ལྔ་པ་སྟེ། ཀུན་སྤྱོད་ཀྱི་ནང་གསེས་བཅོ་ལྔ་པར་གསལ་ཡོད། གཞུང་འབྲེལ་གྱི་ཆབ་སྲིད་དང་རིག་གཞུང་སོགས་ཀྱི་ལས་འགུལ་མ་ཡིན་པའི་ཚོགས་སྡེ་གཞན་གྱི་ལས་འགུལ་ཁག་ལ་གདན་སའི་སློབ་གཉེར་བ་རྣམས་མཉམ་ཞུགས་བྱེད་མི་ཆོག་པའི་དགོངས་དོན་རེད། ལམ་སྟོན་གྲོས་ཆོད་དོན་ཚན་༩་ཅན་དེའི་ནང་དུ་འོས་མི་སུ་ཞིག་གིས་སོ་སོའི་རྒྱབ་སྐྱོར་པ་ཚོར་རེ་སྐུལ་གྱིས་ཁྱབ་བསྒྲགས་ཀྱི་རིགས་དགོན་པའི་ཁོར་ཡུག་གི་གྱང་དང་རྩིག་པ། ཀ་བ་སོགས་སུ་སྦྱར་མི་ཆོག དགོན་པའི་ཚོམས་ཆེན་དང་ཆོས་ར། མཁར་དངོས་རྣམས་ཀྱང་བེད་སྤྱོད་གཏང་ཆོག་གི་མ་རེད། ལྷག་པར་དུ་སྔར་མེད་གསར་སྤྲོས་ཀྱི་ལམ་སྲོལ་ཏེ། འོས་མི་སུ་ཞིག་དགེ་ལུགས་པའི་སྤྱི་འཐུས་ལ་འདེམས་ཐོན་བྱུང་བའི་རྗེས་སུ་ཐོག་མར་གདའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས་ལ་མཇལ་ཁ་ཞུས་ཏེ་དགེ་ལུགས་པའི་སྤྱི་འཐུས་ཀྱི་འོས་འགན་མིང་དོན་མཚུངས་པ་དང་རང་ཚུགས་བརྟན་པོ་འཛིན་དགོས་པ། ཆོས་ལུགས་དང་ཆོས་བརྒྱུད་ཀུན་ལ་འདྲ་མཉམ་དང་གུས་བཀུར་གྱིས་༧གོང་ས་མཆོག་གི་བཀའ་དགོངས་ཁག་འགལ་བ་མེད་པར་བསྒྲུབ་རྒྱུར་འབད་བརྩོད་ལྷོད་མེད་ཞུ་རྒྱུ་ལས། ཆོལ་ཁ་དང་ཆོས་བརྒྱུད་སོགས་ཀྱི་འཐེན་འཁྱེར་དུ་ཞུགས་པ། དེ་བཞིན་ཆབ་སྲིད་ཀྱི་ལག་ཆ་ལྟ་བུར་གཏན་ནས་མི་འགྱུར་བའི་ཁས་ལེན་ཞུ་དགོས་པ་སོགས་བཟོས་འདུག

རྒྱལ་སྤྱིའི་དགེ་ལྡན་ལྷན་ཚོགས་ཀྱི་འཛིན་སྐྱོང་འགན་འཛིན་མཁན་ཟུར་བྱང་ཆུབ་ཆོས་ལྡན་ལ་ཐེངས་འདིའི་ལམ་སྟོན་ཐག་གཅོད་རྣམས་དམངས་གཙོའི་ཐོབ་ཐང་ལ་འགལ་གྱི་འདུག་ཅེས་གླེང་སློང་བྱེད་མཁན་འབྱུང་མི་སྲིད་པ་མིན་པས་དེ་ལ་དགོངས་པ་ཇི་ལྟར་བཞེས་ཀྱི་ཡོད་ཅེས་བཅར་འདྲི་ཞུས། ཁོང་གིས་ལུགས་དང་མཐུན་པའི་སྒོ་ནས་དམངས་གཙོའི་ལས་འགུལ་ཁག་ལ་མཉམ་ཞུགས་བྱེད་དགོས་པ་ལས་དམངས་གཙོའི་ལས་རིམ་ཁག་ལ་ཞུགས་མི་ཆོག་ཟེར་གྱི་མེད་ཅེས་བཀྲལ། ཐེངས་འདིའི་རྒྱལ་སྤྱིའི་དགེ་ལྡན་ལྷན་ཚོགས་ཀྱི་གྲོས་ཆོད་དེ་དག་ནི་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དབུ་བཞུགས་ཀྱིས་ཤར་བྱང་ཆོས་རྗེ་རྣམ་གཉིས་དང་གདན་ས་གསུམ་། གྲྭ་ཚང་དྲུག་དང་རྒྱུད་གྲྭ་སྟོད་སྨད་སོགས་ཀྱི་མཁན་རིན་པོ་ཆེ་དང་སྐུ་ཚབ་བཅས་ཀྱིས་ཐག་གཅོད་གནང་བ་ཞིག་ཡིན་འདུག

བོད་མིའི་སྒྲིག་འཛུགས་ཀྱི་དབུས་འོས་བསྡུ་ལྷན་ཁང་གིས་ཕྱི་ཟླ་༨་ཚེས་༥་ཉིན་ཐེངས་འདིའི་འོས་བསྡུ་ཆེན་མོའི་འོས་མིར་བཞེང་མཁན་རྣམས་ལ་དྲིལ་བསྒྲགས་བྱེད་ཕྱོགས་ཀྱི་རྩ་འཛིན་ལམ་སྟོན་དོན་ཚན་༨་བཀྲམ་ཡོད་པ་དེའི་ནང་དུ་སྒྲིག་གཞི་ཁག་ལ་གསལ་བ་ལྟར་སློབ་གྲྭ་ཁག་ཏུ་འོས་བསྡུ་དང་འབྲེལ་བའི་གཏམ་བཤད་དང་དྲིལ་བསྒྲགས། སྦྱར་ཡིག་གི་རིགས་འགྲེམ་སྤེལ་བྱེད་མི་ཆོག་ཅེས་བཀོད་ཡོད་པའི་སྐོར། རྒྱ་གར་གྱི་རྒྱལ་ས་ལྡི་ལི་ནས་གནས་ཚུལ་མཁོ་གཏོང་བ་བསྟན་འཛིན་ནོར་བཟང་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

Embed share

དགེ་ལུཊ་པའི་གདན་ས་ཁག་ཏུ་འོས་བསྡུའི་དྲིལ་བསྒྲཊ་སྤེལ་མི་ཆོག་པ།

by ཨ་རིའི་རླུང་འཕྲིན་ཁང་།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:07:50 0:00

ཐད་ཀར་ཕབ་ལེན་གྱི་དྲ་འབྲེལ།

• 128 kbps | MP3
• 32 kbps | MP3

གསན་གཟིགས་གནང་ས།