ལྷ་ལྡན་གཙུག་ལག་ཁང་གི་ཁྱམས་རའི་འོག་ཏུ་འཛུགས་སྐྲུན།

Embed share

ལྷ་ལྡན་གཙུག་ལག་ཁང་གི་ཁྱམས་རའི་འོག་ཏུ་འཛུགས་སྐྲུན།

by ཝི་ཨོ་ཨེ།

Embed share

The code has been copied to your clipboard.

The URL has been copied to your clipboard

---

No media source currently available

0:00 0:03:58 0:00

ཐད་ཀར་ཕབ་ལེན་གྱི་དྲ་འབྲེལ།

• 32 kbps | MP3

གསན་གཟིགས་གནང་ས།

༄༅།། ད་ལོ་རྒྱ་ནག་གི་ཝུ་ཧན་གྲོང་ཁྱེར་ནས་ཏོག་དབྱིབས་ནད་དུག་ཁྱབ་སྟེ་འགྲོ་འོང་བཀག བོད་ཀྱི་ལོ་གསར་སྔོན་དུ་ལྷ་ལྡན་གཙུག་ལག་ཁང་དང་ཕོ་བྲང་པོ་ཏ་ལ། གདན་ས་སེ་འབྲས་དགེ་གསུམ་སོགས་སྒོ་བརྒྱབ་སྟེ་ཟླ་བ་བཞི་ཙམ་འདས། ཉེ་ཆར་ཕྱི་ཟླ་༥་ཚེས་༢༠་ཉིན་ལྷ་ས་ཁུལ་གྱི་དགོན་སྡེ་ཁག་བསྐྱར་དུ་ཆོས་སྒོ་ཕྱེས་ཀྱང་གཙུག་ལག་ཁང་སྒོ་ཕྱེ་མེད་ཅིང་། ཁ་སང་ལྷ་ས་གྲོང་ཁྱེར་ནང་བསྟན་མཐུན་ཚོགས་ཀྱིས་དགོན་སྡེ་ཁག་སྒོ་འབྱེད་རྒྱུའི་སྤྱི་བསྒྲགས་ཤིག་སྤེལ་བ་དེར་ལྷ་ལྡན་གཙུག་ལག་ཁང་སྒོ་མ་ཕྱེ་པའི་རྒྱུ་མཚན་ནི་གཙུག་ལག་ཁང་གི་བདེ་སྲུང་དང་མེ་ཟོན། གློག་ཤུགས་མཐོར་འདེགས་སོགས་རིག་དངོས་སྲུང་སྐྱོབ་ཀྱི་ལས་གྲྭ་གཉེར་བཞིན་ཡོད་པས་གནས་སྐབས་རིང་སྒོ་འབྱེད་རྒྱུ་མིན་ཞེས་བཀོད།།

འདི་གའི་གསར་འགོད་པས་དངོས་ཡོད་གནས་ཚུལ་ཤེས་རྟོག་བྱུང་བར་གཞིགས་ན། རྒྱ་ནག་གཞུང་གིས་ཏོག་དབྱིབས་ནད་དུག་ཁྱབ་གདལ་དུ་ཕྱིན་པའི་དུས་སུ་དགོན་པ་ཕལ་ཆེ་མོ་ཆེ་སྒོ་བརྒྱབ་པའི་གོ་སྐབས་ལ་བསྟུན་ནས་ལྷ་སའི་གཙུག་ལག་ཁང་གི་ཁྱམས་རའི་འོག་ཏུ་ས་བྲུས་ནས་ཧ་ཅང་གི་གསང་རྒྱ་དམ་པོས་འཛུགས་སྐྲུན་གྱི་ལས་གཞི་རྒྱ་ཆེན་པོ་ཞིག་གཉེར་བཞིན་ཡོད་པ་སྟེ། དཔེར་ན་མིང་འདོད་བྱེད་འདོད་མེད་པའི་བོད་པ་ཞིག་གིས་ལྷ་ལྡན་གཙུག་ལག་ཁང་མང་ཚོགས་ལ་སྒོ་བརྒྱབ་པ་ནས་བཟུང་སྟེ་ཁྱམས་རའི་འོག་ཏུ་སྔོག་འབྲུ་རྒྱག་གི་ཡོད་པ་དེར་གསང་བ་ཆེན་པོ་ཞིག་བྱེད་ཀྱི་འདུག དོན་དངོས་སུ་ཅི་ཞིག་སྔོག་འབྲུ་བྱེད་ཀྱི་ཡོད་མེད་གསལ་ཁ་མེད་ཀྱང་མང་ཚོགས་ཀྱིས་གཙུག་ལག་ཁང་གི་ཁྱམས་རའི་ས་འོག་ཏུ་གསང་བའི་ཡིག་ཆ་དང་གཏེར་ཁ་ཡོད་པ་རྣམས་རྒྱ་གཞུང་གིས་སྔོག་འདོན་བྱེད་ཀྱི་ཡོད་པའི་གླེང་སློང་བྱེད་བཞིན་པའི་གནས་ཚུལ་ཐོས་རྒྱུ་འདུག་ཅེས་བརྗོད། དེ་སྔོན་དངོས་སུ་མཐོང་མཁན་གྱི་མི་ཞིག་གིས་ཀྱང་ལྷ་ལྡན་གཙུག་ལག་ཁང་གི་ཁྱམས་རའི་འོག་ནས་ཆུ་རྡོ་མང་པོ་ཞིག་བཏོན་ཡོད་པ་དངོས་སུ་མཐོང་མྱོང་ཞེས་བརྗོད་ཡོད་པ་རེད།།

ཉེ་ཆར་ཕྱི་ཟླ་ལྔ་བའི་ཚེས་༨་ཉིན་རྒྱ་ནག་གི་གོ་ལའི་བརྙན་འཕྲིན་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་གཙུག་ལག་ཁང་སྲུང་སྐྱོབ་བྱེད་པའི་ཆེད་དུ་མ་དངུལ་ཨ་སྒོར་ས་ཡ་༥་ནས་༦་ཙམ་འགྲོ་གྲོན་བཏང་སྟེ་ལས་གཞི་འགོ་འཛུགས་བྱེད་ཀྱི་ཡོད། ས་གནས་དང་དབུས་གཞུང་གཉིས་ཀྱིས་འགྲོ་གྲོན་བཏང་སྟེ་ཇོ་ཁང་སྲུང་སྐྱོབ་དང་གློག མེ་གསོད་ཀྱི་མཐུན་རྐྱེན་ས་འོག་ཆུ་ལམ་སོགས་འཛུགས་སྐྲུན་བྱེད་པའི་ལས་གཞི་ཁག་ཅིག་གཉེར་འགོ་ཚུགས་ཡོད། ལས་གཞི་ཁག་ཅིག་འདི་ལོའི་ལོ་མཇུག་ཏུ་འགྲུབ་ཀྱི་རེད་ཅེས་བསྒྲགས། གཞན་ཡང་ལྷ་ས་གྲོང་ཁྱེར་རིག་དངོས་ལས་ཁུངས་ཀྱི་འགོ་གཙོ་ཅིན་ཡུང་ཁྲུན་གྱིས་རིག་དངོས་རྩ་ཆེན་ཡོད་པའི་གཙུག་ལག་ཁང་ནི་མི་འབོར་ཧ་ཅང་མང་བ་དང་ཆུ་དཀོན་པའི་ལྷ་སའི་གྲོང་ཁྱེར་རྙིང་པའི་ཁུལ་དུ་ཆགས་ཡོད་པས་སྲིད་གཞུང་གིས་མེ་གསོད་མཐུན་རྐྱེན་ས་འོག་ཆུ་ལམ་འཛུགས་སྐྲུན་བྱ་རྒྱུའི་ཐག་གཅོད་བྱས་པ་ཡིན། དེས་གཙུག་ལག་ཁང་ལ་མེ་སྐྱོན་བྱུང་ན་འཕྲལ་དུ་གསོད་ཐུབ་པ་དང་ཛ་དྲག་གི་མེ་སྐྱོན་དུས་སུ་གྲོང་ཁྱེར་རྙིང་པའི་བདེ་འཇགས་སྲུང་སྐྱོབ་ལའང་ཁག་ཐེག་བྱེད་ཐུབ་ཅེས་བརྗོད་འདུག
ལྷ་ལྡན་གཙུག་ལག་ཁང་གི་ལོ་རྒྱུས་ཤེལ་དཀར་མེ་ལོང་དང་དབུས་གཙང་རིག་མཛོད་བཅས་སུ་གསལ་བ་ལྟར་ན། ལྷ་ལྡན་སྤྲུལ་པའི་གཙུག་ལག་ཁང་ནི་བོད་ཀྱི་བཙན་པོ་སྲོང་བཙན་སྒམ་པོས་རྒྱ་བཟའ་ཀོང་ཇོ་དང་བལ་བཟའ་ཁྲི་བཙུན་གཉིས་ཁབ་ཏུ་བཞེས་ཏེ་སྤྱི་ལོའི་དུས་རབས་བདུན་པའི་དུས་དཀྱིལ་དུ་བཞེངས། ད་ལྟའི་བར་དུ་ལོ་༡༣༠༠་ལྷག་གི་ལོ་རྒྱུས་ཡོད་ཅིང་། གཙུག་ལག་ཁང་དུ་ཇོ་བོ་ཤྱ་མུ་ནེ་སོགས་རྩ་ཆེའི་སྐུ་གསུང་ཐུགས་རྟེན་བསམ་གྱིས་མི་ཁྱབ་པ་ཞིག་བཞུགས་ཡོད་པས་གཙུག་ལག་ཁང་གི་ཁྱམས་རའི་འོག་ཏུ་རིན་པོ་ཆེའི་གཏེར་རྫས་སྣ་ཚོགས་སྦས་ཡོད་པར་མ་ཟད། རྒྱལ་བ་སྐུ་ཕྲེང་བཅུ་གསུམ་པའི་ཞབས་རྗེས་སོགས་ཡོད་པ། ཁྱམས་ར་ཆེན་མོ་ནི་རྗེ་ཙོང་ཁ་པ་དང་རྒྱལ་དབང་སྐུ་འཕྲེང་ལྔ་པ། སྐུ་ཕྲེང་༡༣་པ་བཅས་ཀྱིས་རིམ་བཞིན་ཉམས་གསོ་དང་རྒྱ་བསྐྱེད། ད་ལྟའི་རྒྱ་ཁྱོན་ཀ་རིང་བརྒྱད་དང་དེའི་བྱིངས་ཀྱི་སྒོ་འཕྱོར། ཀ་བ་བརྒྱ་དང་ཉི་ཤུ་ལྷག་ཙམ་ཡོད་པ་འདི་གྲུབ་པ་རེད་ཅེས་འཁོད་ཡོད་པ་སོགས་ཀྱི་སྐོར། འདི་གའི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་རྒྱ་གར་ལྷོ་ཕྱོགས་ནས་བཏང་བའི་གནས་ཚུལ་དེ་གསན་རོགས་གནང་།།