ངོ་འཕྲད་བདེ་བའི་དྲ་འབྲེལ།

དྲུག་བཞིའི་ལས་འགུལ་གྱི་སྔ་ཕྱི་བར་གསུམ།


ཐད་ཀར་ཕབ་ལེན་གྱི་དྲ་འབྲེལ།

༄༅།། ༡༩༨༩ ལོར་རྒྱ་ནག་གི་སློབ་ཕྲུག་ཚོས་གནམ་བདེ་སྒོ་མོ་ཆེའི་ཐང་དུ་དམངས་གཙོའི་ལས་འགུས་སྤེལ། རྒྱ་ནག་གཞུང་གིས་དམག་བཏང་ནས་སློབ་ཕྲུག་གི་ལས་འགུལ་ལ་ཁྲག་དྲི་བྲོ་བའི་དྲག་གནོན་བྱས་ནས་ད་ལྟའི་བར་དུ་ལོ་༣༡་འདས། ལས་འགུལ་འདི་བྱུང་བའི་སྔ་ཕྱི་བར་གསུམ་དུ་རྒྱ་ནག་གི་མི་རབས་གསར་པའི་དམངས་གཙོ་དོན་གཉེར་གྱི་བསམ་བློར་འགྱུར་ལྡོག་ཅི་ཞིག་ཐེབས་ཡོད་མེད་དང་རྒྱུ་རྐྱེན་གང་འདྲ་ཞིག་ལ་འབྲེལ་བ་ཡོད་མེད་བཅས་ལ་སྐབས་དེའི་དམངས་གཙོའི་ལས་འགུལ་ལ་དངོས་སུ་མཉམ་ཞུགས་བྱས་མྱོང་མཁན་གྱི་མི་སྣ་ཁག་ཅིག་གི་བསམ་ཚུལ་ཕྱོགས་བསྡུས་བྱས་ཡོད།།

༡༩༨༩་ལོར་པེ་ཅིང་སློབ་གྲྭ་ཆེན་མོའི་འབུམ་རམས་ཞིབ་འཇུག་སློབ་མ་ཡིན་པའི་ཀོ་ཡུས་ཧྭ་ལ་མཚོན་ན་ལོ་དེའི་སྤྱི་ཟླ་༤་པའི་ཚེས་༢༧་ཉིན་ནས་ལས་འགུལ་ལ་མཉམ་ཞུགས་བྱས་ཡོད་ཅིང་། ཁོ་མོས་སྐབས་དེར་སྔོན་ཆད་བྱུང་མྱོང་མེད་པའི་སེམས་ཤུགས་དང་རེ་བ་ཞིག་འཆང་ཡོད་པས་སློབ་མའི་ནུས་ཤུགས་དེ་ཧ་ཅང་ཆུང་ཆུང་ཞིག་ལས་མེད་པའམ། ཡང་ན་ལས་འགུལ་ལ་མཉམ་ཞུགས་བྱེད་མཁན་མི་གཅིག་ལས་མེད་ཀྱང་སོ་སོའི་ངོས་ནས་ནུས་ཤུགས་འདོན་དགོས་བསམ་པའི་སེམས་ཤུགས་བཅངས་ཡོད། སྐབས་དེའི་ང་ཚོའི་རེ་འདུན་ཡང་རྒྱལ་ཁབ་འདིར་ཕན་ཞིག་ཐོགས་ན་བསམ་པ་གཅིག་པུ་ཡིན། རྒྱལ་ཁབ་འདི་དམངས་གཙོ་ཅན་དུ་གྱུར་ནས་མི་རེར་འཐོབ་འོས་པའི་རང་དབང་གི་ཐོབ་ཐང་དེ་རྣམས་འཐོབ་ན་སྙམ་པའི་རེ་འདུན་སྤྱིར་བཏང་བ་ཞིག་བཅངས་ཡོད་ཅེས་བཤད་འདུག

ཀོ་ཡུས་ཧྭ་ནི་ལོ་དེའི་ཕྱི་ཟླ་༤་པའི་༢༧་ཉིན་གྱི་ངོ་རྒོལ་ཁྲོམ་སྐོར་ལ་ཞུགས། སྐབས་དེར་རྒྱ་ནག་གི་མི་དམངས་ཉིན་རེའི་ཚགས་པར་ཐོག་ཏུ་ཕྱི་ཟླ་༤་པའི་ཚེས་༡༧་ཚུན་གྱི་ངོ་རྒོལ་ལས་འགུལ་ཡོད་ཚད་ཏང་ལ་ངོ་རྒོལ་དང་སྤྱི་ཚོགས་རིང་ལུགས་ལ་ངོ་རྒོལ་གྱི་ཟིང་འཁྲུག་ཏུ་ངོས་འཛིན་བྱས་པ་རེད། ཡང་ལོ་དེའི་སྤྱི་ཟླ་༥་པའི་ཚེས་༡༧་ཉིན་གྱི་ལས་འགུལ་ལ་མཉམ་ཞུགས་བྱས་པའི་སྐབས་དེའི་པེ་ཅིང་སློབ་ཆེན་གྱི་སློབ་ཕྲུག་ཚོགས་པའི་རྒྱུན་ལས་ཀྲུག་ཧྥུན་སོ་ཡིས་སྐབས་དེར་ང་ལོ་ན་༢༡་ཡིན། ང་ལ་མཚོན་ནའང་སེམས་ཤུགས་དང་རེ་བས་ཁེངས་ཡོད། ཕྱི་ཟླ་༥་པའི་༡༧་ཉིན་ས་ཆ་གཞན་གྱི་སློབ་ཕྲུག་མང་པོ་པེ་ཅིང་དུ་འབྱོར་སོང་། པེ་ཅིང་ས་གནས་སུ་འདུས་པའི་མི་ཚོགས་དང་མཉམ་དུ་མི་ཁྲི་ཕྲག་བརྒལ་ཞིག་གིས་ངོ་རྒོལ་ཁྲོམ་སྐོར་གཞི་རྒྱ་ཆེན་པོ་ཞིག་བྱས་སོང་། སྐབས་དེའི་རང་དབང་གི་འབོད་སྒྲ་དང་མི་དེ་འདྲའི་མང་པོ་ཞིག་ལ་རང་དབང་དགོས་ཞེས་ཐུན་མོང་གི་མངོན་འདོད་ཞིག་ཡོད་པ་ནི་དགའ་དགོས་པ་ཞིག་རེད་སྙམ་པའི་ཚོར་བ་ཞིག་བྱུང་བ་ད་དུང་ཡང་བརྗེད་ཐབས་མི་འདུག་ཅེས་བཤད།།

དེ་མིན་སྐབས་དེར་པེ་ཅིང་དུ་གསར་འགོད་པའི་ཆེད་ལས་གཉེར་བཞིན་པའི་ཨ་རིའི་ལོ་སི་ཨན་ཇཱི་སི་དུས་བབ་ཀྱི་གསར་འགོད་པ་ཇཱེམ་སི་མཱན་གྱིས་ཀྱང་༡༩༨༩་ལོའི་རྒྱ་ནག་དང་། ད་ལྟའི་རྒྱ་ནག་གཉིས་ཀྱི་གནས་སྟངས་གཏན་ནས་མི་འདྲ་བ་ཞིག་རེད། དེ་དུས་རྒྱ་ནག་གཞུང་ཕྱོགས་ཀྱི་མི་དང་སློབ་ཕྲུག་སོགས་སུ་ཞིག་ཡིན་རུང་མི་ཚང་མའི་སེམས་ལ་རེ་བ་ཞིག་དང་བཅོས་སྒྱུར་གྱི་འདུན་པ་ཞིག་བཅངས་འདུག དེའི་རྒྱུ་མཚན་ནི་སྐབས་དེར་རྒྱ་ནག་རིག་གནས་གསར་བརྗེའི་ལས་འགུལ་ལས་གྲོལ་མ་ཐག་རེད། རྒྱ་ནག་གི་མཐོ་རིམ་འགོ་ཁྲིད་ཀྱི་གྲས་སུ་སློབ་ཕྲུག་ཚོར་རེ་སྐུལ་བྱེད་མཁན་བྱུང་ཡོད་ཅིང་། རྒྱ་ནག་ལ་འགྱུར་ལྡོག་ཅིག་འཐེབས་རྒྱུའི་ལམ་ཁ་གསལ་པོ་ཞིག་ཡོད་མིན་ལ་མ་ལྟོས་པར་མི་ཚང་མའི་སེམས་སུ་རྒྱ་ནག་ལ་འགྱུར་བ་འགྲོ་བཞིན་པ་ཞིག་དང་ངེས་པར་དུ་འགྱུར་བ་འགྲོ་དགོས་པ་ཞིག་ལ་ངོས་འཛིན་བྱེད་ཀྱི་འདུག འགྱུར་ལྡོག་ཐེབས་ཐབས་གཅིག་ནི་ནུབ་ཕྱོགས་ལ་སྒོ་འབྱེད་རྒྱུ་དེ་རེད། སྐབས་དེར་མཚོན་ན་རྒྱ་ནག་གི་ན་གཞོན་མང་པོས་ཕྱི་ལོགས་ཀྱི་གནས་ཚུལ་ལ་རྒྱུས་ལོན་བྱ་རྒྱུར་འབད་བརྩོན་བྱེད་བཞིན་འདུག ཐ་ན་ཨ་རིའི་སྤྱིར་བཏང་གི་མིའི་འཚོ་བ་སྐྱེལ་སྟངས་ཀྱང་ངོ་མཚར་ཅན་ཞིག་ལ་རྩི་བཞིན་ཡོད་པའི་དུས་སྐབས་ཤིག་རེད་ཅེ་བཤད་འདུག

དོན་དངོས་སུའང་རིག་གསར་མཇུག་རྫོགས་མ་ཐག་པའི་རྒྱ་ནག་གིས་ཕྱི་ལ་སྒོ་མོ་གསར་དུ་ཕྱེས་པ་དེར་བསྟུན་ནས་མི་མང་པོའི་བློ་རྒྱ་བསྐྱེད། བསམ་བློ་ཡང་ཧ་ཅང་གི་ཧུར་པོ་དང་ཚོར་བ་སྐྱེན་པོ་ཞིག་ཏུ་གྱུར་ཡོད་པས་སློབ་ཕྲུག་དང་ཤེས་ཡོན་ཅན། ཐ་ན་གྲོང་མི་དཀྱུས་མ་བཅས་ཀྱིས་ཀྱང་རྒྱལ་ཁབ་ཀྱི་མདུན་ལམ་ལ་བགྲོ་གླེང་ཚ་ཚ་འུར་འུར་བྱེད་བཞིན་པའི་དུས་སྐབས་ཤིག་ཡིན་འདུག དྲུག་བཞིའི་ལས་འགུལ་རྗེས་ཀྱི་ལོ་༣༡་གི་རིང་ལ་༡༩༨༩་ལོར་བྱུང་བའི་སྣང་ཚུལ་དེ་འདྲ་ཞིག་བསྐྱར་དུ་བྱུང་མེད་པའི་ངོས་འཛིན་བྱེད་བཞིན་ཡོད་ཅིང་། ཇཱེམ་སི་མཱན་གྱིས་སྐབས་དེའི་རྒྱ་ནག་གི་སློབ་ཕྲུག་ཚོས་རྒྱལ་གཅེས་ཀྱི་བསམ་བློ་དང་ཕུགས་བསམ་ལྡན་པའི་བསམ་བློ་ཞིག་བཅངས་ཏེ་དེང་རབས་ཅན་གྱི་སྤྱི་ཚོགས་ལ་བློ་ཁ་ཕྱོགས་ཏེ་སྐབས་དེའི་བསམ་བློ་དང་། དེང་སྐབས་རྒྱ་ནག་གིས་ཨ་རིར་ངོ་རྒོལ་བྱེད་བཞིན་པའི་རྒྱལ་གཅེས་ཀྱི་བསམ་བློ་ཟེར་པ་གཉིས་གཏན་ནས་འདྲ་ས་མི་འདུག སྐབས་དེའི་རྒྱ་ནག་གི་སློབ་ཕྲུག་ཚོའི་རྒྱལ་གཅེས་རིང་ལུགས་ཀྱི་བསམ་བློ་དང་ཕུགས་བསམ་ནི་རྒྱ་ནག་དམར་ཤོག་ཚོགས་པའི་དབང་སྒྱུར་བཅད་རྒྱ་ལས་བརྒལ་བའི་རྒྱལ་གཅེས་ཀྱི་བསམ་བློ་ཞིག་རེད་ཅེས་བཀྲལ།།

༡༩༨༩་ལོའི་རྒྱ་ནག་གི་དྲག་གནོན་དུས་སུ་མེ་མདའ་བརྒྱབ་པ་དང་ལྕགས་ཁྲབ་འཁོར་ལོ་བཏང་སྟེ་སློབ་ཕྲུག་མང་པོ་དམར་བྱས་པར་མ་ཟད། དུས་དེ་ནས་བཟུང་སྟེ་རྒྱ་ནག་མི་དམངས་ཀྱི་ཆབ་སྲིད་བཅོས་སྒྱུར་གྱི་ཕུགས་འདུན་རྨེག་མེད་དུ་བཅོམ། དྲུག་བཞིའི་ལས་འགུལ་གཞུག་ནས་རྒྱ་ནག་ལ་དམངས་གཙོ་གླེང་སློང་དང་མི་དམངས་འདུ་འཛོམས་བྱས་ནས་ངོ་རྒོལ་གྱི་ལས་འགུལ་སྤེལ་རྒྱུ། རྒྱ་ནག་གི་ཆབ་སྲིད་ལམ་ལུགས་ལ་བཅོས་སྒྱུར་གཏོང་དགོས་ཞེས་གླེང་སློང་བྱེད་མི་ཆོག་པའི་དམར་ཐིག་ཅིག་འཐེན་ཡོད་པ་དེ་ནས་བརྒལ་མི་ཆོག་པར་སྔར་ལས་སྟངས་འཛིན་ནན་མོ་བྱེད་འགོ་ཚུགས། དེ་དང་བསྟུན་ནས་རྒྱ་ནག་དམར་ཤོག་ཚོགས་པས་དཔལ་འབྱོར་འཕེལ་རྒྱས་གཏོང་རྒྱུར་ནུས་ཤུགས་བཏོན། ཐབས་ལམ་དེ་བརྒྱུད་ནས་དམར་ཤོག་ཚོགས་པའི་དབང་སྒྱུར་དེ་ཁྲིམས་མཐུན་དུ་སྒྱུར་ཐབས་སུ་འབད་བརྩོན་བྱས་ཡོད་པ་རེད།།

དྲུག་བཞིའི་ལས་འགུལ་བྱུང་བའི་རྗེས་སུ་རྒྱ་ནག་གཞུང་གིས་གནམ་བདེ་སྒོ་མོ་ཆེའི་ཐང་གི་ལས་འགུལ་ལ་ཞུགས་པའི་སློབ་ཕྲུག་མང་པོ་ཞིག་འཛིན་བཟུང་བཙོན་འཇུག་བྱས་ནས་ཉེས་ཆད་བཅད། རྒྱ་ནག་གི་སློབ་ཆེན་ཁག་ཏུ་སློབ་ཕྲུག་ཚོར་རྒྱལ་གཅེས་རིང་ལུགས་ཀྱི་སློབ་གསོ་སྤེལ་རྒྱུའི་མགོ་བརྩམས། ༡༩༨༩་ལོ་ནས་༡༩༩༢་བར་དུ་རྒྱ་ནག་གི་པེ་ཅིང་སློབ་ཆེན་དང་ཧྥུའུ་ཏན་སློབ་ཆེན་གཉིས་ཀྱི་དངོས་གཞིའི་སློབ་ཕྲུག་ཡོངས་ལ་དུས་ཡུན་ལོ་གཅིག་རེའི་ནང་དུ་དམག་དོན་སྦྱོང་བརྡར་དང་རྒྱལ་གཅེས་རིང་ལུགས་ཀྱི་སློབ་གསོ་སྤེལ། དེའི་རྗེས་སུ་སློབ་ཕྲུག་ལ་དམག་སྦྱོང་བྱེད་དུ་འཇུག་རྒྱུ་དེ་སློབ་ཆེན་ནས་སློབ་འབྲིང་ཡོངས་སུ་ལག་བསྟར་བྱེད་བཞིན་པ་རེད། འདི་ལ་རྒྱ་ནག་གི་ལོ་རབས་༩༠་བའི་ནང་དུ་སློབ་ཕྲུག་ཡིན་པ་ཞིག་གིས་ཨ་རིའི་རླུང་འཕྲིན་ཁང་དུ་བཤད་པ་ལྟར་ན། ཁོ་མོ་སློབ་ཆེན་གྱི་སྐབས་དེར་རྒྱ་ནག་གི་ཧྲི་ཅ་ཀྲོང་ས་གནས་སུ་དམག་དོན་སྦྱོང་བརྡར་བྱ་ཡུལ་གྱི་སློབ་གྲྭ་ཞིག་ཏུ་བསྐྱལ་སོང་། སྐབས་དེར་ཉིན་ལྟར་དམག་གླུ་ལེན་པ་དང་དམག་སྦྱོང་བྱེད་དུ་འཇུག་གི་འདུག ངས་སེམས་པར་ཁོ་ཚོས་དེ་ལྟར་བྱེད་དགོས་པའི་དམིགས་ཡུལ་ནི་ང་ཚོ་ཁ་ལ་ཉན་མཁན་དང་སྒྲིག་སྲོལ་བརྩི་མཁན། བཀའ་ལ་ཉན་མཁན་ཞིག་ལ་བསྒྱུར་རྒྱུའི་ཆེད་དུ་རེད་ཅེས་བཤད།།

ཡང་ཕྱོགས་གཞན་ཞིག་ནས་བཤད་ན་རྒྱ་གཞུང་གིས་དྲུག་གཞིའི་ལས་འགུལ་དེ་རྒྱ་ནག་གི་སློབ་ཕྲུག་ཚོའི་སེམས་ནས་ཡོངས་སུ་བརྗེད་དུ་འཇུག་པར་༡༩༨༩་ལོའི་སློབ་ཕྲུག་གི་དམངས་གཙོའི་ལས་འགུལ་གྱི་གནས་ཚུལ་གཅིག་ཀྱང་རྒྱ་ནག་གི་ལོ་རྒྱུས་སློབ་དེབ་ཁག་ཏུ་མ་བཀོད། ད་ལྟ་ཧོང་ཀོང་གི་སློབ་དེབ་ཏུའང་དྲུག་བཞིའི་སྐོར་གྱི་གནས་ཚུལ་འཁོད་ཡོད་པ་རྣམས་ནག་སུབ་གཏོང་ཐབས་བྱེད་བཞིན་པ་རེད།།

གོང་གི་རྒྱུ་རྐྱེན་འདི་འདྲའི་མང་པོ་ཞིག་ལ་བརྟེན་ནས་ད་ལྟའི་རྒྱ་ནག་གི་ན་གཞོན་ཚོར་ལོ་རྒྱུས་ཀྱི་དྲན་ཤེས་ཉམས་སུ་བཅུག་ཡོད་ཅིང་། ད་ལྟའི་ན་གཞོན་རྣམས་ལོ་རབས་༨༠་བའི་སློབ་ཕྲུག་ཚོ་ཇི་བཞིན་རྒྱལ་ཁབ་ཀྱི་རང་དབང་དང་དམངས་གཙོའི་ལས་དོན་ལ་དོ་སྣང་མེད་པ། སློབ་ཕྲུག་གི་དམིགས་ཡུལ་གཙོ་བོ་ནི་དངུལ་སྒོར་འཚོལ་སྒྲུབ་བྱ་རྒྱུ་ཁོ་ན་ཡིན་པས་གནས་སྟངས་འདི་འདྲ་ཞིག་གི་འོག་ཏུ་རྒྱ་ནག་གི་སྤྱི་ཚོགས་སུ་རང་དབང་དང་དམངས་གཙོ་གླེང་སློང་བྱེད་མཁན་ཚོར་འཕྱ་དམོད་བྱེད་ཀྱི་འདུག ཐ་ན་དྲུག་བཞིའི་ལས་འགུལ་སྐོར་གླེང་སློང་ཙམ་བྱས་ཀྱང་དེ་ལ་འཕྱ་དགོད་བྱེད་མཁན་ཡོད་ལ། རྒྱ་ནག་གི་ན་གཞོན་མང་པོ་ཞིག་གི་ཀླད་པ་བཀྲུས་ཡོད་པའི་དབང་གིས་མ་འོངས་པར་རྒྱ་ནག་ལ་རང་དབང་དང་དམངས་གཙོ་དགོས་མིན་གྱི་གནད་དོན་དང་བོད་དོན། ཞིན་ཅང་གི་གནད་དོན་དང་ཧོང་ཀོང་གི་གནད་དོན་བཅས་ལ་ན་གཞོན་མང་ཆེ་བའི་བསམ་བློ་གཏོང་སྟངས་རྒྱ་ནག་དམར་ཤོག་སྲིད་གཞུང་གི་ལངས་ཕྱོགས་དང་གཅིག་མཚུངས་རེད་ཅེས་དཔྱད་བརྗོད་སྤེལ་ཡོད་པ་རེད།།

XS
SM
MD
LG