ངོ་འཕྲད་བདེ་བའི་དྲ་འབྲེལ།

སྨན་པ་ལི་ལ་མྱ་ངན་དང་རྒྱ་གཞུང་ལ་ངོ་རྒོལ་མཆན་རྩོམ།


ཐད་ཀར་ཕབ་ལེན་གྱི་དྲ་འབྲེལ།

༄༅།། སྔ་ལོའི་ཕྱི་ཟླ་༡༢་པའི་ཚེས་༣༠་ཉིན་རྒྱ་ནག་གི་ཝུ་ཧན་གྲོང་ཁྱེར་གྱི་སྨན་པ་ལི་ཝེན་ལེང་ཞེས་པ་ཞིག་གིས་གྲོང་ཁྱེར་དེར་གློ་ཚད་ལྟ་བུའི་འགོས་ནད་ཅིག་ཁྱབ་གདལ་འགྲོ་བཞིན་འདུག ལས་རོགས་སྨན་པ་རྣམས་དང་སྨན་ཞབས་པ་ཚོས་རང་གི་བདེ་འཇགས་དོན་དུ་ནད་འགོག་གྱོན་ཆས་གོན་དགོས་པ་དང་ཁ་རས་བརྒྱབ་ནས་གཟབ་ནན་བྱ་དགོས་ཀྱི་འདུག་ཅེས་སྐད་འཕྲིན་ནང་དུ་འཕྲིན་ཐུང་ཞིག་བསྐུར། དེ་ནས་ལས་རོགས་ཚོས་འཕྲིན་ཐུང་དེ་སྤྱི་ཚོགས་དྲྭ་ལམ་ཁག་ཏུ་བརྒྱུད་བསྐུར་བྱས་ནས་ཝུ་ཧན་གྲོང་ཁྱེར་དང་རྒྱ་ནག་གི་སྤྱི་ཚོགས་སུ་ཡོངས་ཁྱབ་ཀྱིས་བཀྲམ་ནས་མི་དམངས་ལ་ཉེན་བརྡ་བཏང་རུང་ཝུ་ཧན་གྲོང་ཁྱེར་གྱི་ཉེན་རྟོག་པས་སྨན་པ་ལི་འབོད་འགུགས་བྱས་ནས་ཁྱོད་ཀྱིས་དཀྲོག་གཏམ་སྒྲོགས་ཀྱི་འདུག སྤྱི་ཚོགས་ཀྱི་སྒྲིག་སྲོལ་ལ་གཏོར་བརླག་བྱེད་ཀྱི་ཡོད་འདུག་ཅེས་ནག་ཉེས་བཙུགས། ཁྱོད་ཀྱིས་ཅི་ཞིག་བྱེད་ཀྱི་ཡོད་པ་ཤེས་སམ། ཁྱོད་ཀྱིས་འགན་འཁྲི་ལེན་ཐུབ་བམ་ཞེས་ཁ་རྡུང་བཏང་ནས་སྨན་པ་ལིས་སྐད་འཕྲིན་ནང་དུ་བཀྲམ་པའི་འཕྲིན་ཐུང་དེ་ཁྲིམས་འགལ་བྱས་པ་ཞིག་ཡིན་པའི་ནག་ཉེས་ངོས་ལེན་གྱི་ཡིག་ཆ་ཞིག་ལ་མིང་རྟགས་འགོད་དུ་བཅུག ཁ་སང་ཕྱི་ཟླ་༢་ཚེས་༦་ཉིན་སྨན་པ་ལི་ལ་གློ་ཚད་རིམས་ནད་འགོས་ནས་ཝུ་ཧན་གྲོང་ཁྱེར་གྱི་སྨན་ཁང་ཞིག་ཏུ་འདས་གྲོངས་སུ་གྱུར།

དེར་བརྟེན་རྒྱ་ནག་མི་མང་ཁྲི་ཚོ་མང་པོས་སྐད་འཕྲིན་དང་ཝི་པོ་སོགས་སྤྱི་ཚོགས་དྲྭ་ལམ་ཁག་ཏུ་ཉེན་རྟོག་པས་དྲག་གནོན་ལ་ངོ་རྒོལ་ཡོད་པའི་མཚོན་དོན་གླུ་གཞས་ཕབ་ལེན་བྱས་པ་དང་ཁྱེད་ཚོས་མི་དམངས་ཀྱི་སྐད་སྒྲ་ཐོས་སམ། དཔའ་རྒོད་ཅིག་མེད་པར་གྱུར་སོང་། ཁོང་ནི་གསང་བ་ཕྱིར་སྒྲོགས་བྱེད་མཁན་ཙམ་མིན་པར་མི་དམངས་ཀྱི་དཔའ་བོ་ཞིག་རེད། གཏམ་བརྗོད་རང་དབང་བཀག་སྡོམ་ལ་ངོ་རྒོལ་ཡོད། མི་དམངས་རྣམས་ཡར་ལོངས་ཤོག ཝུ་ཧན་གྲོང་ཁྱེར་གཞུང་གིས་སྨན་པ་ལི་ལ་བཟོད་གསོལ་ཞུ་དགོས། ང་ཚོར་གཏམ་བརྗོད་རང་དབང་དགོས། ད་ལྟ་ང་ཚོས་ཅི་ཞིག་མྱོང་གི་ཡོད་པ་བརྗེད་མི་ཉན། ཁོང་ཁྲོ་འདི་འཇམ་དུ་མ་འཇུག ང་ཚོས་ངེས་པར་དུ་གནས་ཚུལ་འདིའི་རིགས་བསྐྱར་ཟློས་འབྱུང་དུ་འཇུག་མི་ཉན། བདེན་པ་ལ་རྟག་ཏུ་དཀྲོག་གཏམ་ཞེས་ཉེས་མིང་འདོགས་ཀྱི་འདུག ཁྱེད་ཚོས་དུས་ནམ་ཞིག་བར་དུ་རྫུན་བཤད་རྒྱུ་ཡིན་ནམ། ད་དུང་གཞན་པ་ཅི་ཞིག་སྦ་གསང་བྱས་ཡོད་དམ། གལ་སྲིད་ཁྱོད་ཀྱིས་ཅི་ཞིག་མཐོང་ཐོས་འབྱུང་གི་ཡོད་པ་འདིར་ཁོང་ཁྲོ་ལངས་ན་ཡར་ལོངས་ཤོག ན་གཞོན་མི་རབས་རྣམས། ཁྱེད་ཚོར་འགྱུར་ལྡོག་གཏོང་ཐུབ་པའི་སྟོབས་ཤུགས་ཡོད་ཅེས་རྒྱ་ནག་གཞུང་ལ་ངོ་རྒོལ་དང་ཝུ་ཧན་གྲོང་ཁྱེར་གཞུང་ལ་སྐྱོན་བརྗོད། རྒྱ་ནག་གཞུང་གིས་སྨན་པ་ལིའི་ཁ་བཀག་ནས་འགོས་ནད་ཁྱབ་གདལ་འགྲོ་བཞིན་པ་སྦ་གསང་བྱས་པར་ཁོང་ཁྲོ་ཆེན་པོས་མཆན་རྩོམ་འབུམ་ཕྲག་འགའ་ཞིག་སྤེལ་མོད། འོན་ཀྱང་རྒྱ་ནག་གཞུང་གིས་སྐད་འཕྲིན་དང་ཝི་པོ་སོགས་སྤྱི་ཚོགས་དྲྭ་ལམ་གྱི་མཆན་རྩོམ་ཕལ་ཆེ་བ་འཕྲལ་དུ་ནག་སུབ་བྱས་ནས་ཉུང་ཤས་ཤིག་ལས་རིག་རྒྱུ་མེད་པར་བཏང་མེད་པ་རེད།

རྒྱ་ནག་གཞུང་གིས་ཝུ་ཧན་གྲོང་ཁྱེར་ནས་ཁྱབ་པའི་གློ་ཚད་ནད་དུག་གིས་རེས་གཟའ་ཕུར་བུའི་མཚན་དཀྱིལ་བར་དུ་མི་༦༣༦་ལ་འཆི་སྐྱོན་བྱུང་སོང་། འགོས་ནད་ཕོག་ཡོད་པའི་ནད་པའི་གྲངས་འབོར་མི་༣༡༡༦༡་ལ་སླེབས་སོང་ཞེས་བསྒྲགས། རྒྱ་ནག་མི་དམངས་དང་ཉམས་ཞིབ་པ་ཚོས་རྒྱ་གཞུང་གིས་ཁྱབ་བསྒྲགས་བྱ་པ་གྲངས་འབོར་ངོ་མ་དེ་མིན་པའི་ཚོད་དཔག་བྱས་ཀྱི་ཡོད་ཅིང་། འདས་པའི་ལོ་༧་གྱི་རིང་ལ་རྒྱ་ནག་གི་སྲིད་འཛིན་ཞིས་ཅིན་ཕིང་གིས་གསར་འགོད་པ་དང་ཁྲིམས་རྩོད་པ། ཤེས་ཡོན་ཅན་དང་རྩོམ་པ་པོ། ཚོང་པ་སོགས་སྲིད་གཞུང་གི་ལྟ་བར་མོས་མཐུན་མེད་པའི་ལངས་ཕྱོགས་འཛིན་མཁན་རྣམས་འཛིན་བཟུང་དང་བཙོན་འཇུག རྒྱ་ནག་གཞུང་གིས་གསར་འགྱུར་དང་དྲྭ་ལམ་བཅས་ལ་ཞིབ་བཤེར་བྱས་ནས་གཏམ་བརྗོད་རང་དབང་མེད་ཀྱང་རྒྱ་ནག་མི་དམངས་ཀྱིས་སྨན་པ་ལི་འདས་གྲོངས་སུ་གྱུར་པར་གདུང་ཤུགས་དྲག་པོས་མྱ་ངན་དང་ཕངས་སེམས། རྒྱ་ནག་གཞུང་ལ་ངོ་རྒོལ་བྱ་དགོས་ཞེས་མཆན་རྩོམ་འབུམ་ཕྲག་འགའ་ཞིག་བྲིས་པ་ནི་རྒྱ་ནག་གི་སྤྱི་ཚོགས་སུ་འབྱུང་དཀོན། ཉམས་ཞིབ་པ་ཚོས་རྒྱ་ནག་གཞུང་གིས་བྲེལ་མྱུར་གྱིས་སྨན་པ་ལི་ལ་མི་དམངས་ཀྱིས་རྗེས་དྲན་དང་སྲིད་གཞུང་ལ་ངོ་རྒོལ་གྱི་མཆན་རྩོམ་བྲིས་པ་རྣམས་ནག་སུབ་བྱ་ཐབས་སུ་འབད་འདུག སྲིད་གཞུང་གི་དམ་དྲག་ནན་པོ་དང་སྨྲ་བརྗོད་རང་དབང་གཏན་ནས་མེད་པའི་ཁོར་ཡུག་ཅིག་ཏུ་མི་མང་གིས་འཛེམ་ཟོན་མེད་པར་དྲྭ་ལམ་ལ་ངོ་རྒོལ་གྱི་མཆན་རྩོམ་འབྲི་ཕོད་པ་དེ་ལ་བལྟས་ཚེ། རྒྱ་ནག་གི་མི་དམངས་དཀྱུས་མ་ཚོ་གཅིག་པུ་མིན་པར་གཞུང་གི་ལས་བྱེད་པ་དང་བཟོ་ཚོང་ལས་ཁང་ཁག་གི་འགོ་ཁྲིད། རྒྱ་ནག་གི་སྤྱི་ཚོགས་སུ་ཕྱོགས་ཡོངས་ནས་སྲིད་གཞུང་གི་ལས་དོན་སྒྲུབ་ཕྱོགས་ལ་འདོད་པ་མ་ཚིམས་ཤུགས་ཆེན་པོ་ཡོད་པ་མཚོན་ཐུབ་ཅེས་དཔྱད་རྩོམ་སྤེལ་འདུག

ཁ་སང་གཟའ་ཕུར་བུའི་དགོང་མོ་ནས་རྒྱ་ནག་གི་སྤྱི་ཚོགས་དྲྭ་ལམ་ཁག་ཏུ་སྨན་པ་ལི་འདས་གྲོངས་སུ་གྱུར་པའི་གནས་ཚུལ་ཁྱབ་གདལ་སོང་། རྒྱ་ནག་དམར་ཤོག་ཚོགས་པའི་དྲིལ་བསྒྲགས་ཚན་པས་དྲྭ་ལམ་གྱི་མཆན་རྩོམ་རྣམས་འགོག་ཐབས་དང་ནག་སུབ་གཏོང་རྒྱུ་མགོ་བརྩམས། ཡིན་ནའང་རྒྱ་ནག་གི་སྤྱི་ཚོགས་དྲྭ་ལམ་དུ་ཁྱབ་ཟིན་པའི་མཆན་རྩོམ་རྣམས་ནག་སུབ་གཏོང་རྒྱུ་བདེ་བླག་ཏུ་སྒྲུབ་ཐུབ་མེད་པ་དང་རྒྱ་ནག་མི་དམངས་ཀྱིས་དྲྭ་ལམ་དུ་ཁོང་ཁྲོ་དང་སྐྱོ་གདུང་། སྨན་པ་ལི་ལ་མྱ་ངན་གྱི་མཆན་རྩོམ་བྲིས་པར་ཞིབ་བཤེར་བྱེད་མི་ཐུབ་པའི་ཚད་དུ་ལྷུང་ཡོད་པར་མ་ཟད། རྒྱ་ནག་གཞུང་གིས་ས་གནས་སོ་སོར་ལས་དོན་རུ་ཁག་བཏང་ནས་རྒྱལ་ཡོངས་མི་དམངས་ཀྱིས་སྨན་པ་ལི་ལ་གདུང་ཤུགས་དྲག་པོས་མྱ་ངན་བྱེད་དོན་ཅི་ཞིག་ཡིན་མིན་རྩད་གཅོད་བྱེད་དུ་བཅུག་འདུག སྨན་པ་ལིས་ཝུ་ཧན་གྲོང་ཁྱེར་ལ་གློ་ཚད་ལྟ་བུའི་འགོས་ནད་ཅིག་ཁྱབ་ཀྱི་འདུག་ཅེས་ཉེན་བརྡ་བཏང་བ་རྒྱ་ནག་གཞུང་གིས་དཀྲོག་གཏམ་དང་སྤྱི་ཚོགས་ཀྱི་སྒྲིག་སྲོལ་ལ་གཏོར་བརླག་བྱས་པའི་ནག་ཉེས་སུ་བསྒྱུར། ཁོ་ཚོས་སྨན་པ་ལིའི་ཁ་བཀག་ནས་འགོས་ནད་ཅིག་ཁྱབ་གདལ་འགྲོ་བཞིན་པ་སྦ་གསང་བྱས་པར་རྒྱ་ནག་མི་དམངས་རྣམས་བཟོད་གླགས་མེད་པའི་ཁོང་ཁྲོ་ལངས། མི་མང་གིས་ཕྱི་ལོ་༢༠༠༣་ལོར་རྒྱ་ནག་ལ་སཱར་སི་ཞེས་པའི་གློ་ཚད་ཅིག་ཁྱབ་གདལ་སོང་ནས་དཀའ་ངལ་ཆེན་པོ་ཕྲད་ཀྱང་ད་དུང་ཡང་རྒྱ་ནག་གི་འགོ་ཁྲིད་ཚོར་ཉམས་མྱོང་དང་སློབ་གསོ་ཅི་ཡང་ཐོབ་མེད་པ་འདྲ་ཞེས་ཁ་རྡུང་བཏང་འདུག

ཉི་མ་རེ་ཟུང་གོང་དེར་སྨན་པ་ལིས་ཕྱི་རྒྱལ་གྱི་གསར་འགོད་པ་ཚོར་ཝུ་ཧན་གྲོང་ཁྱེར་ལ་གློ་ཚད་རིམས་ནད་དེ་ཇི་ལྟར་ཁྱབ་པ་དང་ཁོ་པ་འགོས་ནད་དེར་དོ་སྣང་ཇི་ལྟར་བྱུང་མིན། རྒྱ་ནག་མི་དམངས་ཀྱིས་ནད་ཡམས་དེར་སྔོན་འགོག་ཇི་ལྟར་བྱས་ན་ལེགས་མིན་སོགས་ཡོངས་གྲགས་སུ་བཤད། དྲྭ་ལམ་དུ་མཆན་རྩོམ་འབྲི་མཁན་ཞིག་གིས་སྨན་པ་ལིར་རང་ཉིད་དཔའ་བོ་ཞིག་ལ་འགྱུར་དུ་འཇུག་དགོས་སྙམ་པའི་ཀུན་སློང་ཡོད་མི་སྲིད། འོན་ཀྱང་ང་ཚོ་༢༠༢༠་ལོར་འཚོ་གནས་ཡིན་པ་རྣམས་ལ་མཚོན་ན་སྨན་པ་ལིས་དཔའ་རྒོད་ཅིག་གིས་སྒྲུབ་སྲོལ་ཡོད་པའི་ལས་དོན་དེ་བསྒྲུབས་སོང་ཞེས་བསྔགས། མཆན་རྩོམ་གཞན་ཞིག་ཏུ་མང་ཚོགས་ལ་འབུད་ཤིང་སྤྲོད་མཁན་དེས་ཁ་བའི་ཁྲོད་དུ་འཁྱག་འཕྱིད་ཐེབས་ནས་གྲོངས་ཀྱི་ཡོད་པའི་འཆི་བ་འགོག་ཐུབ་ཟེར་པ་ཞིག་ཀྱང་བྲིས་འདུག འདི་ནི་ལོ་༧་གྱི་སྔོན་ལ་རྒྱ་ནག་གི་རྩོམ་པ་པོ་མུ་རོང་ཤུའེ་ཚུན་ཞེས་པ་ཞིག་དང་གྲོགས་པོ་ཚོས་དངུལ་སྒོར་འདུ་འགོད་བྱས་ནས་རྒྱ་ནག་གི་སྲིད་དོན་བཙོན་པ་རྣམས་ཀྱི་ཤུལ་ལུས་བཟའ་མི་ཚོར་ལྟ་སྐྱོང་བྱས་པའི་སྐབས་སུ་བྲིས་པའི་སྐད་ཆ་ཞིག་ཡིན་ཞིང་། སྐད་ཆ་འདིས་གཞུང་གི་དབང་འཛིན་པ་ཚོར་ཁ་གཏད་གཅོག་ཕོད་མཁན་ཚོར་རྒྱབ་སྐྱོར་བྱ་དགོས། སྐྱེ་བོ་མང་པོ་ཞིག་འཁྱག་འཕྱིད་ཐེབས་ནས་ཤི་བ་རེད་ཟེར་པར་གཞུང་ལ་ཁ་གཏད་གཅོག་ཕོད་མཁན་ཚོར་རྒྱབ་སྐྱོར་པ་ཉུང་ཉུང་རེད་ཟེར་པའི་གོ་དོན་འདུས། ད་དུང་མཆན་རྩོམ་གཞན་ཞིག་ལ་ཁྱེད་ཚོས་མི་དམངས་ཀྱི་དཀའ་ངལ་ཐོས་པར་ང་ཚོས་བློས་གཏོང་ཅི་ཙམ་བྱ་དགོས་སམ་ཞེས་བྲིས་ཡོད་པ་ཞིག་ཀྱང་བཀོད་འདུག

XS
SM
MD
LG