ངོ་འཕྲད་བདེ་བའི་དྲ་འབྲེལ།

གཟའ་པ་སངས། ༢༠༢༤/༠༣/༢༩

བོད་པ་ཚོས་རྒྱ་ནག་དམར་ཤོག་གི་འགོ་ཁྲིད་ལྔར་ཕྱག་མཆོད་བྱ་དགོས་པ།


ཐད་ཀར་ཕབ་ལེན་གྱི་དྲ་འབྲེལ།

༄༅།། རྒྱ་ནག་གཞུང་གིས་ཆ་བགོ་བྱེད་ཡོད་པའི་དཀར་མཛེས་བོད་རིགས་རང་སྐྱོང་ཁུལ། སེར་ཤུལ་རྫོང་རྫ་ཆུ་ཁའི་བོད་པ་ཚོར་ཆབ་སྲིད་ཀྱི་བསམ་བློའི་སློབ་གསོ་གཏོང་བའི་ཚོགས་འདུ་རབ་དང་རིམ་པ་ཞིག་ཚོགས་དང་འཚོགས་བཞིན་ཡོད་ཅིང་། ཚོགས་འདུ་ཁག་གི་ཐོག་ཏུ་བོད་པ་ཚོར་ཁྱེད་ཚོར་བཀའ་དྲིན་ཆེ་ཤོས་ནི་ཀྲུང་གོ་གུང་ཁྲན་ཏང་ཡིན་པ་ལས་ཏཱ་ལའི་བླ་མ་མིན་པ་སོགས་ཀྱི་བསླབ་བྱ་བརྒྱབ། ལྷག་པར་དུ་བོད་པ་ཚོར་སྔོན་མ་ནས་བཀྲམ་ཡོད་པའི་རྒྱ་ནག་དམར་ཤོག་གི་འགོ་ཁྲིད་མའོ་རྩེ་ཏུང་དང་ཏེང་ཞའོ་ཕིང་། ཅང་ཙེ་མིན་དང་ཧུའུ་ཅིན་ཐའོ། ཞིས་ཅིན་ཕིང་བཅས་འགོ་ཁྲིད་ལྔའི་འདྲ་པར་རྙིང་པ་རྣམས་གསར་པར་བརྗེས་ནས་ཁྱིམ་ཚང་རེར་འདྲ་པར་གསར་པ་རེ་དང་གློག་གི་མཆོད་མེ་རེ། ཁ་བཏགས་རེ་དང་རྒྱ་ནག་གི་རྒྱལ་དར་གསར་པ་རེ་བཅས་སྤྲད་ནས་ངེས་པར་དུ་ཁྱིམ་ཚང་གི་ཁང་པའི་ཐོག་ཏུ་རྒྱལ་དར་སྒྲེང་འཛུགས་བྱ་དགོས་པ་དང་མཆོད་གཤོམ་ནང་དུ་སྦྱར་ཡོད་པའི་རྒྱ་ནག་གི་འགོ་ཁྲིད་དེ་དག་གི་འདྲ་པར་ལ་གློག་གི་མཆོད་མེ་ཕུལ་ནས་མཆོད་པ་བཤམ་དགོས་པ། བོད་པ་ཚོས་སྔ་དགོང་གཉིས་སུ་འདྲ་པར་དེར་ཕྱག་འཚལ་དགོས་པའི་བཙན་བཀའ་ཕབ་སོང་ཞེས་མིང་བརྗོད་འདོད་མེད་པའི་ས་གནས་དེའི་འབྲེལ་ཡོད་བོད་པ་ཞིག་གིས་འདི་གའི་གསར་འགོད་པར་གནས་ཚུལ་མཁོ་སྤྲོད་བྱས་འདུག

གསར་འགྱུར་མཁོ་སྤྲོད་པས་མུ་མཐུད་དུ་འགྲེལ་བརྗོད་གནང་དོན་ལྟར་ན། ད་ལོ་རྒྱ་དཀར་ནག་གཉིས་ཀྱི་དམག་དཔུང་རྣམས་བོད་ཀྱི་ས་མཚམས་སུ་འཁྲུག་རྩོད་བྱུང་བའི་གནས་ཚུལ་རྣམས་ལབ་གླེང་བྱེད་མི་ཆོག་པའི་བཀའ་བཏང་ཡོད་པར་མ་ཟད། ད་དུང་སྐད་འཕྲིན་བརྒྱུད་ནས་རྒྱ་གར་ལ་འབྲེལ་བྱེད་མཁན་ཚོར་དམིགས་བསལ་གྱི་དོ་དམ་བྱེད་ཤུགས་ཆེ་རུ་བཏང་འདུག་ ཉེ་ཆར་སྐད་འཕྲིན་བརྒྱུད་ནས་རྒྱ་གར་ལ་སྤུན་མཆེད་ཚོར་དངུལ་སྒོར་གྱི་ཁུག་དམར་བསྐུར་བའི་ཉེས་མིང་འོག་ཏུ་བོད་པ་གསུམ་འཛིན་བཟུང་། ཡང་འབྲེལ་ཡོད་བོད་པ་གཞན་ཞིག་གིས་རྫ་ཆུ་ཁར་རྒྱ་ནག་གི་དཔོན་རིགས་ཚོའི་འདྲ་པར་སྦྱར་ཡོད་མེད་དང་རྒྱལ་དར་ཡག་པོ་སྒྲེང་ཡོད་མེད་ལྟ་རྟོག་ཆེད་དུ་རྒྱ་གཞུང་གི་ས་གནས་ཉེན་རྟོག་པ་ཚོ་བདུན་ཕྲག་གཉིས་རེའི་མཚམས་སུ་ཁྱིམ་ཚང་སོ་སོར་ལྟ་སྐོར་དུ་ཡོང་གི་འདུག འདི་ནི་རྒྱ་ནག་གིས་བརྗོད་བཞིན་པའི་སྣང་ཆེན་གཅིག་དང་དགའ་ཞེན་བཞི་ཟེར་བའི་ལས་འགུལ་གྱི་ཆ་ཤས་ཤིག་རེད་ཅེས་བཤད།།

སྤྱིར་༢༠༠༨་ནས་བཟུང་སྟེ་བོད་ས་གཞན་དང་འདྲ་བར་རྫ་ཆུ་ཁའི་བོད་པ་ཚོས་ཀྱང་ཡར་ལངས་ཞི་རྒོལ་གྱི་ལས་འགུལ་རིམ་པར་སྤེལ་བས་རྒྱ་ནག་གཞུང་གིས་དྲག་གནོན་བྱས་པའི་གནས་ཚུལ་མང་དག་ཅིག་ཐོན། དཔེར་ན་ཕྱི་ལོ་༢༠༡༩་ཕྱི་ཟླ་༡༡་ཚེས་༡༨་དང་༢༡་ཉིན་རྫ་ཆུ་ཁའི་རྫ་སྨད་དབོན་པོ་སྡེ་པར་སྔ་གཞུག་ཏུ་རྒྱ་ནག་གཞུང་གི་དྲག་གནོན་སྲིད་ཇུས་ལ་ངོ་རྒོལ་བྱས་ནས་བོད་པ་༧ འཛིན་བཟུང་བཙན་ཁྲིད་བྱས་ཏེ་དམག་མི་མང་པོ་འགྲེམ་འཇོག་བྱས་ནས་དམ་དྲག་ཆེན་པོ་བྱས་ཤིང་། དེའི་རྗེས་སུ་ཕྱི་ཚེས་༢༤་ནས་ཕྱི་ཟླ་དང་པོའི་ཚེས་༣་བར་དུ་སེར་སྐྱ་༣༠་བརྒལ་བ་ཞིག་ལ་རྩམ་པ་གཅིག་པུ་མ་གཏོགས་བཟའ་བཏུང་གང་ཡང་མ་སྤྲད་པར་ཟླ་ཕྱེད་རིང་དུ་བཀག་ཉར། དེ་བཞིན་གྲྭ་པ་མང་པོ་ཞིག་ལ་བསམ་བློའི་སློབ་གསོ་གཏོང་དགོས་ཞེས་ཟླ་ཕྱེད་ལྷག་ལ་ ཉིན་ལྟར་བསམ་བློ་སྒྱུར་བཀོད་ཀྱི་སློབ་གསོའི་ཚོགས་འདུ་ཚོགས། བོད་པ་མང་ཚོགས་ལ་ཕྱིས་སུ་ཆབ་སྲིད་ཀྱི་གནད་དོན་འབྱུང་མི་ཆོག་ཅེས་བསྒྲགས་གཏམ་སྤེལ། གཞན་ཡང་དབོན་པོ་སྡེ་པའི་ཡུལ་མི་དང་སྡེ་པ་གཞན་གྱི་གྲོང་མི་སོགས་སེར་སྐྱ་མང་པོ་ཞིག་གི་ཁ་པར་སྔོག་བཤེར། ཁོ་ཚོ་ཉེན་རྟོག་ཁང་ལ་འབོད་འགུགས་བྱས་ནས་འདྲི་རྩད་མང་པོ་བྱས་ཏེ་ཁས་ལེན་ཡིག་ཆ་ཁག་ལ་མིང་རྟགས་འགོད་དུ་བཅུག་པ་སོགས་ཀྱི་གནས་ཚུལ་ཐོན་འདུག་པའི་སྐོར། རྒྱ་གར་ལྷོ་ཕྱོགས་ནས་འདི་གའི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་བཏང་བའི་གནས་ཚུལ་དེ་གསན་རོགས་གནང་།།

XS
SM
MD
LG