ངོ་འཕྲད་བདེ་བའི་དྲ་འབྲེལ།

རྒྱ་ནག་གིས་ལྷོ་བྲག་རྫོང་དུ་དམག་སྒར་གསར་འཛུགས།


༄༅།། དེང་སྐབས་འཛམ་གླིང་ཡུལ་གྲུ་གང་སར་ཏོག་དབྱིབས་ནད་དུག་ལ་གདོང་ལེན་བྱེད་བཞིན་པའི་སྐབས་འདིར་རྒྱ་ནག་གཞུང་གིས་ལྷོ་ཁ་གྲོང་ཁྱེར། ལྷོ་བྲག་རྫོང་དུ་དམག་སྦྱོང་བྱ་ཡུལ་དམག་སྒར་ཨང་༣༢་པ་ཞེས་པ་ཞིག་གསར་འཛུགས་བྱེད་བཞིན་ཡོད་པའི་གནས་ཚུལ་ཐོན་འདུག དེ་ཡང་ཕྱི་ཟླ་༥་པའི་ཚེས་༢༩་ཉིན་མིང་འདོན་བྱེད་འདོད་མེད་པའི་མི་ཞིག་གིས་ཁུངས་ལྡན་གནས་ཚུལ་དང་འདྲ་པར་བཅས་བཏང་འབྱོར་བྱུང་བ་ལྟར་ན། ཟླ་བ་འདིའི་ཕྱི་ཚེས་༨་ནས་རྒྱ་ནག་གཞུང་གིས་བོད་རང་སྐྱོང་ལྗོངས། ལྷོ་ཁ་གྲོང་ཁྱེར་གྱི་ལྷོ་བྲག་རྫོང་། སྒྲོ་བ་གྲོང་རྡལ་ནས་སྤྱི་ལེ་༣༠་ཙམ་གྱི་མཚམས་སུ་ཡོད་པའི་སེང་ཆུའི་འགྲམ་དུ་དམག་སྦྱོང་ལྟེ་གནས་ཀྱི་དམག་སྒར་ཨང་༣༢ པ་ཟེར་བ་ཞིག་གསར་དུ་འཛུགས་སྐྲུན་གྱི་ལས་གྲྭ་འགོ་ཚུགས་ཡོད་པ་རེད།།

ཁོང་གིས་དེ་ནི་ལྷ་ས་ནས་སེངྒེ་ཁ་འབབ་ལ་བསྐྱོད་སའི་གཞུང་ལམ་ལྟེ་བར་ཁེལ་འདུག སྤྱིར་སེངྒེ་ཁ་འབབ་མངའ་འོག་ལ་མཚོན་ན་དམག་སྒར་མང་པོ་ཞིག་ཡོད་ཀྱང་དམག་སྒར་༣༢་པ་དེ་དམིགས་བསལ་ཛ་དྲག་གི་དགོས་མཁོའི་དུས་སུ་བཀོལ་སྤྱོད་གཏང་རྒྱུ་ཡིན་པར་མ་ཟད། དམག་སྒར་དེའི་དམག་མི་རྣམས་ཀྱང་དམག་སྦྱོང་དང་མཚོན་ཆ་སོགས་གང་ས་ཅི་ཐད་ནས་དམག་སྒར་གཞན་ལས་ཡག་ག་ཡོད་པ་ཤ་སྟག་བསྡུ་བཞིན་ཡོད་འདུག ཉེ་ཆར་ཕྱི་ཟླ་༥་པའི་ཚེ་༡༤་ཉིན་གྱི་ཞོགས་པར་ལྷོ་ཁ་གོང་དཀར་གནམ་ཐང་ནས་དམག་འཐབ་གནམ་གྲུ་བཞི་དང་དམག་མིའི་རླངས་འཁོར་༢༡་བཅས་ལྷོ་བྲག་དམག་སྒར་ཨང་༣༢་པར་བསླེབས་འདུག ད་ལྟ་གསར་དུ་འཛུགས་སྐྲུན་བྱེད་བཞིན་པའི་དམག་སྒར་༣༢ པ་ནི་༢༠༢༠་ལོའི་ཕྱི་ཟླ་༢་པའི་ནང་དུ་ལས་གྲྭ་འགོ་འཛུགས་འཆར་ཡོད་ཀྱང་སྐབས་དེར་ཏོག་དབྱིབས་ནད་དུག་ཁྱབ་པས་ལས་གཞི་མགོ་རྩོམ་ཐུབ་མེད་པ་རེད་ཅེས་འགྲེལ་བརྗོད་གནང་སོང་།།

གསར་འགྱུར་མཁོ་སྤྲོད་པས་མུ་མཐུད་དུ་བརྗོད་དོན་ལྟར་ན། དམག་སྒར་༣༢་པ་ནས་སེངྒེ་དམག་སྒར་བར་དུ་སྤྱི་ལེ་༧༠་ལྷག་ཡོད་ཅིང་། རྒྱ་གར་གྱི་ས་མཚམས་བར་དུ་ཕལ་ཆེར་དབྱིན་ལི་༢༠༠་ཡས་མས་ཤིག་ཡོད་ས་རེད། ཕྱི་ལོ་༢༠༢༢་ལོར་ས་ཆ་དེར་དམག་སྒར་ཆེན་པོ་ཞིག་ཚུགས་འཆར་ཡོད་འདུག ལྷོ་བྲག་རྫོང་གི་སྒྲོ་བ་ལུང་དང་གསར་འཛུགས་བྱེད་བཞིན་པའི་དམག་སྒར་༣༢ པ་ནས་གཡས་ཕྱོགས་སུ་ཕྱིན་ན་འབྲུག་འབུམ་ཐང་ཕྱོགས་སུ་སླེབས་རྒྱུ་རེད། གཡོན་ཕྱོགས་སུ་ཕྱིན་ན་རྒྱ་གར་གྱི་ས་མཚམས་སུ་སླེབས་ཀྱི་རེད། སེངྒེ་དམག་སྒར་ནི་ལྷོ་བྲག་ཁུལ་དུ་དམག་སྒར་མང་པོ་ཡོད་པའི་གྲས་ཀྱི་དམག་སྒར་ཆེ་ཤོས་དེ་རེད། ས་མཚམས་ཁག་ལ་དམག་མི་མང་ཤོས་སེངྒེ་དམག་སྒར་ནས་གཏོང་གི་འདུག ཕྱི་ལོ་༢༠༡༩་ལོར་གོང་དཀར་གནམ་ཐང་དེ་དམག་གི་ལྟེ་གནས་ལྟ་བུ་ཞིག་ཏུ་གྱུར། ཕྱི་ལོ་༢༠༡༨་ལོར་ལྷ་སའི་མེ་འཁོར་འབབ་ཚུགས་ཀྱི་རྒྱལ་སྒོ་ཨང་༡༢ པ་དེ་དམག་མི་འགྲོ་སར་ཆེད་དུ་བཟོས། དེའི་རྗེས་སུ་རྒྱལ་སྒོ་ཨང་༡༡་དང་༢་པའང་དམག་མི་འགྲོ་ཡུལ་དུ་བཟོས་། སྔ་ལོ་ས་ཁུལ་གང་ས་ནས་ལྷོ་བྲག་རྫོང་གི་དམག་སྒར་ཁག་ལ་དམག་མི་འབུམ་ལྔ་ཙམ་བསྡུ་རུབ་བྱས་ཡོད་པ་རེད་ཅེས་འགྲེལ་བརྗོད་གནང་སོང་།

འདི་དང་དུ་མཚུངས་སུ་བོད་ལྗོངས་ཉིན་རེའི་ཚགས་པར་ལ་བོད་རང་སྐྱོང་ལྗོངས་ཀྱི་འགོ་གཙོ་ཝུ་དབྱིན་ཅིས་ཕྱི་ཟླ་༥་ཚེས་༡༦་ཉིན་ལྷོ་བྲག་ཁུལ་དུ་ལས་དོན་རྟོག་ཞིབ་དང་མང་ཚོགས་ལ་ས་མཚམས་ས་ཁུལ་གལ་ཆེན་པོ་ཡིན་པ། མང་ཚོགས་ཀྱིས་ཏང་གི་བཀའ་ལ་ཉན་དགོས་པ་སོགས་ཀྱི་གཏམ་བཤད་བྱས་འདུག གསར་འགོད་པས་ཤེས་རྟོགས་བྱུང་བར་གཞིགས་ན། ལྷོ་བྲག་ནི་ལྷོ་ཁ་གྲོང་ཁྱེར་གྱི་ཆེས་མཐའ་ཁུལ་དུ་ཆགས་པའི་ རྫོང་ཞིག་ཡིན་ཞིང་། བོད་དང་འབྲུག་ཡུལ། རྒྱ་གར་གསུམ་གྱི་ས་མཚམས་སུ་ཁེལ། ལྷག་པར་དུ་འབྲུག་ཡུལ་ལ་ཐག་ཉེ་བོ་ཡོད་འདུག ལྷོ་བྲག་རྫོང་གི་རྒྱ་ཁྱོན་ནི་སྤྱི་ལེ་ངོས་སྙོམས་གྲུ་བཞི་མ་༤༤༢༦་དང་། ཆུ་བོའི་ཁྱབ་ཚད་སྤྱི་ལེ་ངོས་སྙོམས་གྲུ་བཞི་མ་༤༠༠་ཡོད་ཅིང་། ས་ཞིང་གི་རྒྱ་ཁྱོན་མུའུ་ཁྲི་༣་དང་རྩྭ་ཐང་གི་རྒྱ་ཁྱོན་མུའུ་ཁྲི་༢༣༠་ཡོད། མི་འབོར་ཁྲི་༡.༧་ཡོད་པ་དང་ས་མཐོ་ཤོས་ལ་རྒྱ་མཚོའི་ངོས་ལས་སྤྱི་ལེ་༧༥༣༨་འདུག ས་ཆ་དམའ་ཤོས་ལ་རྒྱ་མཚོའི་ངོས་ལས་སྤྱི་ཁྲེ་༢༧༤༠་ཡོད་ཀྱང་ཆ་སྙོམས་རྒྱ་མཚོའི་ངོས་ལས་སྤྱི་ཁྲེ་༣༨༢༠་ཙམ་གྱི་ས་བབ་སུ་ཆགས་ཡོད་པའི་སྐོར། འདི་གའི་གསར་འགོད་པ་རྒྱལ་མཚན་ཆོས་གྲགས་ལགས་ཀྱིས་རྒྱ་གར་ལྷོ་ཕྱོགས་ནས་བཏང་བའི་གནས་ཚུལ་དེ་གསན་རོགས་གནང་།།

ཐད་ཀར་ཕབ་ལེན་གྱི་དྲ་འབྲེལ།


XS
SM
MD
LG