ཨ་རིའི་རླུང་འཕྲིན་ཁང་གི་ཀུན་གླེང་གསར་འགྱུར་ནང་༧གོང་ས་མཆོག་གི་བོད་ཀྱི་རིག་གཞུང་སྲུང་སྐྱོབ་བྱེད་དགོས་པའི་བཀའ་སློབ་དང་། སྲོག་ཆགས་ཀྱི་ཚོར་ཤེས་ཚོགས་འདུར་ཆིབས་སྒྱུར་བསྐྱངས་པ། བོད་ཁམས་གསར་འགྱུར། སྲིད་སྐྱོང་གི་ཕྱོགས་སྐྱོད། ཨ་རི་དང་ཧྥེ་ལེ་པིན་གྱི་འབྲེལ་ལམ། སུའུ་ཏན་གྱི་དམག་འཁྲུག་གནས་སྟངས་སོགས་ཡོད། ཀུན་གླེང་ལས་རིམ་དུ་ཚེ་རིང་སྐྱིད་ལགས་ཀྱིས་རྒྱ་གར་གྱི་རྒྱལ་ས་ལྡི་ལི་ནས་ཆབ་སྲིད་རིག་པའི་གཙུག་ལག་རམ་འབྱམས་པའི་སློབ་མ་བསྟན་འཛིན་དབང་ཕྱུག་ལགས་གདན་འདྲེན་ཞུས་ནས་རྒྱ་གར་དེ་འཛམ་གླིང་སྟེང་གི་མི་འབོར་མང་ཤོས་ཀྱི་རྒྱལ་ཁབ་ཆགས་པ་དང་དེ་ལ་བརྟེན་པའི་ཡུལ་བབ་སྲིད་ཇུས་ཀྱི་ཐད་བགྲོ་གླེང་ཞུ་རྒྱུ་དང་། དེ་བཞིན་དུ་ཚེ་རིང་སྐྱིད་ལགས་ཀྱིས་བོད་ཕྲུག་ཁྱིམ་སྡེའི་སྤྱི་ཁྱབ་འགན་འཛིན་བསོད་ནམས་སྲིད་ཆོས་ལགས་གདན་འདྲེན་ཞུས་ནས་བཙན་བྱོལ་བོད་མིའི་ཤེས་ཡོན་དང་བོད་ཕྲུག་ཁྱིམ་སྡེའི་ཐད་བགྲོ་གླེང་ཞུས་ཡོད་པས་དུས་ཐོག་གསན་གཟིགས་གནང་བར་ཞུ།།