༄༅།། རྒྱ་ནག་གཞུང་གིས་ཆ་བགོ་བྱེད་ཡོད་པའི་ཀན་སུའུ་ཞིང་ཆེན། ཀན་ལྷོ་བོད་རིགས་རང་སྐྱོང་ཁུལ་གྱི་བླ་བྲང་དང་གཙོས། ཅོ་ནེ་བཅས་ལ་ཟླ་བ་འདིའི་ཕྱི་ཚེས་༧་ཉིན་དྲག་ཆར་འདྲེས་མའི་སེར་བ་ཆེན་པོ་བབས་ཏེ་དུས་ཡུན་སྐར་མ་ཁ་ཤས་ཀྱི་རིང་དུ་མང་ཚོགས་ཀྱི་དཔལ་འབྱོར་ལ་གྱོང་གུད་ཚབས་ཆེན་ཐེབས་ཡོད་པའི་གནས་ཚུལ་ཐོན་འདུག
བོད་ནང་གི་ས་གནས་དེ་གའི་བོད་པ་ཞིག་གིས་འདི་ག་རླུང་འཕྲིན་ཁང་གི་གསར་འགོད་པར་བརྗོད་དོན་ལྟར་ན། ཕྱི་ཚེས་༧་གྱི་ཕྱི་དྲོར་རྒྱ་ནག་གི་ཆུ་ཚོད་ལྔ་དང་ཕྱེད་ཀ་ཡས་མས་སུ་གློ་བར་དུ་དྲག་ཆར་འདྲེས་མའི་སེར་བ་བབས་ནས་ཡུན་ཐུང་ཞིག་གི་ནང་དུ་གནོད་འཚེ་ཆེན་པོ་ཐེབས་སོང་། ས་གནས་ཁག་གསུམ་གྱི་ནང་ནས་གནོད་པ་ཆེ་ཤོས་ཐེབས་ས་ནི་ཅོ་ནེ་རྫོང་རེད། ཅོ་ནེ་རྫོང་གི་གཡས་གཡོན་དུ་གཞིས་ཆགས་པའི་བོད་པ་དང་རྒྱ་མིའི་གྲོང་སྡེ་ཁག་གི་ས་ཞིང་ཚང་མར་འདམ་ཉོག་འཁྱིལ་ནས་གནོད་པ་ཚབ་ཆེན་ཐེབས་སོང་། སྦྱིར་ལོ་འདིའི་ས་ཞིང་བཏབ་ནས་ཡུན་རིང་ཕྱིན་མེད་པའི་སྐབས་ཤིག་རེད། ད་ལྟ་དྲག་ཆར་གྱིས་རྐྱེན་པས་ས་ཞིང་བཏབ་ཟིན་པ་དེར་གནོད་སྐྱོན་ཐེབས་འདུག མང་ཚོགས་ཀྱིས་བསྐྱར་དུ་ས་ཞིང་སློག་ནས་ལོ་ཏོག་འདེབས་དགོས་བ་ལས་། དེ་སྔ་བཏབ་ཟིན་པ་རྣམས་སྐྱེ་མི་ཐུབ་པ་ཞིག་ལ་གྱུར་འདུག ཉིན་གཅིག་གཉིས་ཀྱི་རྗེས་སུ་སླར་ཡང་ས་ཞིང་གདབ་དགོས་ཀྱི་འདུག་ཅེས་འགྲེལ་བརྗོད་བྱས་བྱུང་།།
