༧གོང་ས་སྐྱབས་མགོན་༧རྒྱལ་བ་རིན་པོ་ཆེ་མཆོག་གིས་༧པཎ་ཆེན་སྐུ་གོང་མའི་ཡང་སྲིད་དུ་ངོས་འཛིན་གནང་བའི་༧པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་ལོ་དྲུག་ལ་ཕེབས་དུས་རྒྱ་ནག་གཞུང་གིས་བཙན་ཁྲིད་བྱས་པ་ནས་ད་ལྟའི་བར་གནས་ཚུལ་ཅི་ཡང་ཤེས་རྟོགས་མེད་པར་ལྷག་ཡོད་པ་དང་། ལོ་ལྟར་སྤྱི་ཟླ་༤ཚེས་༢༥ཉིན་ནི་ཁོང་གི་འཁྲུངས་སྐར་ཡིན་པ་ལྟར་ད་ལོ་ཁོང་དགུང་གྲངས་༣༠ཕེབས་པའི་སྐུའི་འཁྲུངས་སྐར་ཉིན་བཞུགས་སྒར་རྡ་རམ་ས་ལར་བོད་མིའི་སྒྲིག་འཛུགས་ཀྱིས་གཞུང་འབྲེལ་ཐོག་འཁྲུངས་སྐར་སྲུང་བརྩི་གནང་ཡོད། གཞན་ཡང་གཞུང་འབྲེལ་མིན་པའི་ཚོགས་པ་ཁག་གིས་༧པཎ་ཆེན་རིན་པོ་ཆེ་གློད་འགྲོལ་དགོས་པའི་ལས་འགུལ་སྤེལ་ཡོད་པ་སོགས་ཀྱི་སྐོར་ལ་བཞུགས་སྒར་རྡ་རམ་ས་ལ་ནས་འདི་གའི་གསར་འགོད་པ་བསྟན་འཛིན་བཟང་མོ་ལགས་ཀྱིས་བཏང་གནང་པའི་གནས་ཚུལ་ཞིག་ལ་གསན་རོགས་གནང་།
