|
བལ་ཡུལ་གྱི་ཇ་ནག་པུར་གྲོང་ཁྱེར་གྱི་མེ་འཁོར་འབབ་ཚུགས་སུ་ཕྱི་མི་གནས་སྤོར་ལས་ཁུངས་བརྒྱུད་ནས་འགྲུལ་པ་རྣམས་དེབ་སྐྱེལ་དང་ཆོག་མཆན་སྤྲོད་རྒྱུ་ཡིན་པར་མ་ཟད། མེ་འཁོར་ལྕགས་ལམ་གྱི་འགྲིམ་འགྲུལ་བརྒྱུད་ནས་རྒྱ་གར་དང་བལ་ཡུལ་གྱི་ས་མཚམས་བརྒལ་ན་ཕྱོགས་གཉིས་ཀྱི་སྤྱི་དམངས་ལ་ཐོངས་ཆེན་ཞུ་མི་དགོས་པའི་གྲོས་མཐུན་བྱུང་ཞིང་། ཐོག་མར་ལྕགས་ལམ་དེ་འགྲུལ་སྐྱེལ་མེ་འཁོར་ནས་འགོ་ཚུགས་རྒྱུ་ཡིན་པ་དང་། དེ་ནས་བལ་ཡུལ་ཕྱོགས་ནས་རིམ་བཞིན་འགྲུལ་པ་སྐྱེལ་འདྲེན་དང་དངོས་ཟོག་སྐྱེལ་འདྲེན་བྱ་འཆར་ཡོད་འདུག རྒྱ་གར་གྱི་གསར་ལམ་ཁག་ཏུ་མེ་འཁོར་ལྕགས་ལམ་ལས་ཁུངས་ཀྱི་གསར་འགྱུར་ལུང་འདྲེན་བྱས་ནས་གནས་ཚུལ་སྤེལ་བ་ལྟར་ན་བལ་ཡུལ་ལ་མཁོ་བའི་མེ་འཁོར་གྱི་མཐུན་རྐྱེན་དང་ཞབས་ཞུའི་མེ་འཁོར་ཁང་མིག་རྣམས་རྒྱ་གར་ནས་བོག་མར་ལེན་རྒྱུ། རྒྱ་གར་གྱི་ཕྱི་སྲིད་ལྷན་ཁང་གིས་བལ་ཡུལ་གཞུང་གི་བློན་ཆེན་རིམ་པ་དང་འབྲེལ་ཡོད་བཟོ་ཚོང་ལས་ཁང་སོགས་ལ་མེ་འཁོར་ལྕགས་ལམ་གྱི་ལས་གཞི་དེར་མཉམ་འབྲེལ་ཚོགས་འདུ་ཚོགས་ཡོད་ཅེས་བརྗོད་འདུག བལ་ཡུལ་གྱི་རྒྱལ་ས་ཀ་ཐ་མན་རྡུ་ནས་རྒྱ་གར་གྱི་བྷི་ཧར་མངའ་སྡེའི་རཀ་སོལ་གྲོང་རྡལ་བར་གྱི་མེ་འཁོར་ལྕགས་ལམ་གཙོས་རྒྱ་གར་དང་བལ་ཡུལ་དབར་དུ་མེ་འཁོར་ལྕགས་ལམ་ཁག་བཞི་འཛུགས་འཆར་ཡོད་པ་དང་། རྒྱ་གར་དང་བལ་ཡུལ་བར་དུ་མེ་འཁོར་ལྕགས་ལམ་འཛུགས་སྐྲུན་བྱ་རྒྱུ་ནི་རྒྱ་ནག་གིས་བོད་ནས་བལ་ཡུལ་གྱི་རྒྱལ་ས་བར་དུ་མེ་འཁོར་ལྕགས་ལམ་འཛུགས་རྒྱུའི་འཆར་གཞི་ཡོད་པར་ཁ་གཏད་གཅོག་པའི་ཆེད་དུ་ཡིན་པ་མཚོན་ཐུབ། རྒྱ་ནག་གིས་བལ་བོད་ས་མཚམས་ཀྱི་སྐྱིད་གྲོང་ནས་བལ་ཡུལ་གྱི་རྒྱལ་ས་བར་དུ་རྒྱང་ཐག་སྤྱི་ལེ་༧༠་ལྷག་ཡོད་པའི་མེ་འཁོར་ལམ་ཞིག་འཛུགས་སྐྲུན་བྱ་རྒྱུ་ལག་བསྟར་ཐུབ་མིན་གྱི་ཞིབ་འཇུག་བྱས་ཚར་ཡོད་པས། དེ་ནི་ས་མཐོའི་ཧི་མ་ལ་ཡའི་རི་རྒྱུད་དུ་རྨང་གཞིའི་འཛུགས་སྐྲུན་གྱི་དམིགས་ཚད་མཐོ་ཤོས་སུ་གྱུར་འདུག
|
གཟའ་སྤེན་པ། ༢༠༢༤/༠༥/༡༡
