ངོ་འཕྲད་བདེ་བའི་དྲ་འབྲེལ།

དམག་ཆེན་དང་པོ་མཇུག་བསྒྲིལ་ནས་ལོ་༡༠༠་འཁོར་པ།


༄༅།། ༢༠༡༨་ལོའི་ཕྱི་ཟླ་༡༡་ཚེས་༡༡་ནི་འཛམ་གླིང་དམག་ཆེན་དང་པོ་མཇུག་བསྒྲིལ་ནས་ལོ་༡༠༠་ཐམ་པ་འཁོར་པའི་དུས་དྲན་ཡིན་ཞིང་། ཡུ་རོབ་རྒྱལ་ཁབ་ཁག་གི་དམངས་ཞབས་འདས་པོའི་དུར་ཁྲོད་ཁག་ཏུ་གཞུང་གི་འགོ་ཁྲིད་ཚོ་དང་དམག་ཞབས་ཟུར་པ། མི་དམངས་དཀྱུས་མ་སོགས་ཀྱིས་མེ་ཏོག་གི་ཕྲེང་བ་ཕུལ་བ་དང་དམག་དུང་འབུད་པ། དམག་འཁྲུག་ནང་དུ་འདས་གྲོངས་སུ་གྱུར་པའི་དམག་ཞབས་འདས་པོ་དག་གི་དུར་སའི་འགྲམ་དུ་འབྲེལ་ཡོད་རྒྱལ་ཁབ་ཁག་གི་རྒྱལ་དར་བསྒྲེངས་ནས་འགྲོ་བ་མིའི་ལོ་རྒྱུས་སུ་བྱུང་བའི་ཆེས་མུན་ནག་གི་དུས་སྐབས་དེར་ཕྱིར་དྲན་བྱེད་ཀྱི་ཡོད་པ་སྟེ། ཧྥ་རན་སིའི་བྱང་ཕྱོགས་དང་བྷེལ་ཇེམ་སོགས་ཡུ་རོབ་རྒྱལ་ཁབ་ཁག་གི་ས་གནས་གང་སར་འཛམ་གླིང་དམག་ཆེན་དང་པོའི་སྐབས་ཀྱི་དམག་འཁྲུག་གི་འཛིང་རའི་ཤུལ་དང་དམག་ཞབས་འདས་པོ་རྣམས་ཀྱི་དུར་ས། དམག་འཁྲུག་གི་རྗེས་དྲན་ས་གནས་ཁག་ཏུ་འདུ་འཛོམས་ཀྱི་བྱེད་སྒོ་སྣ་མང་ཞིག་འཕེལ་གྱི་ཡོད་པ་དང་། གཟའ་མཇུག་འདིར་རྒྱལ་ཁབ་༦༠་ལྷག་གི་འགོ་ཁྲིད་རྣམས་ཧྥ་རན་སིའི་རྒྱལ་ས་ཕེ་རི་སི་ལ་ལྷན་འཛོམས་ཀྱིས་༡༩༡༨་ལོར་དམག་འཁྲུག་མཚམས་འཇོག་གི་གྲོས་མཐུན་ལ་མིང་རྟགས་བཀོད་པར་རྗེས་དྲན་བྱ་རྒྱུ། ཧྥ་རན་སིའི་སྲིད་འཛིན་མེཀ་ཧོང་གིས་ཡུ་རོབ་རྒྱལ་ཁབ་ཁག་གི་གཞུང་དམངས་གཉིས་ཀས་འདས་པའི་ལོ་རྒྱུས་ལ་ཕྱིར་དྲན་དང་འབྱུང་འགྱུར་ལ་བསམ་ཞིབ། ཡུ་རོབ་ཀྱི་ཞི་བདེ་བརྟན་ལྷིང་རྒྱུན་འཁྱོངས་ཀྱི་རྗེས་དྲན་ཚོགས་འདུ་ཞིག་སྐོང་གི་ཡོད་པ་རེད།

༡༩༡༤་ལོའི་ཕྱི་ཟླ་༧་ཚེས་༢༨་ནས་༡༩༡༨་ལོའི་ཕྱི་ཟླ་༡༡་ཚེས་༡༡་བར་དུ་ལངས་པའི་འཛམ་གླིང་དམག་ཆེན་དང་པོར་ཨ་མི་རི་ཀ་དང་ཡུ་རོབ་རྒྱལ་ཁབ་ཁག་གི་དམག་ས་ཡ་༤༠་དང་འབུམ་༧་ལྷག་དམག་འཁྲུག་ལ་ཞུགས། ཡུ་རོབ་ཀྱི་དམག་ས་ཁག་ཏུ་དམག་དང་མི་དམངས་དཀྱུས་མ་ཡ་༢༠་ཡས་མས་ཤིག་ལ་སྲོག་སྐྱོན་ཕོག མི་གྲངས་ས་ཡ་༢༣་ལྷག་ལ་རྨས་སྐྱོན་ཕོག་ཡོད་པ་ནི་རགས་རྩིས་ཀྱི་ཚོད་དཔག་ཙམ་ཡིན་ཞིང་། ཨ་མི་རི་ཀ་གཅིག་པུའི་དམག་༡༡༦༥༡༦་ལ་སྲོག་སྐྱོན་དང་དམག་༣༢༠༠༠༠ལ་རྨས་སྐྱོན་དང་ནད་མནར་བྱུང་། ཨ་མི་རི་ཀའི་དམག་རྣམས་འཛམ་གླིང་དམག་ཆེན་དང་པོའི་འཐབ་ས་ཁག་ཏུ་འཆི་རྨས་བྱུང་བ་ལས་ཀྱང་ནད་མནར་གྱིས་འཆི་སྐྱོན་བྱུང་བའི་གྲངས་འབོར་མང་བ་མ་ཟད། འཇར་མན་ཎིའི་རྒྱལ་ས་བྷར་ལིན་གྲོང་ཁྱེར་གྱི་དུར་ས་གཅིག་གི་ནང་དུ་འཛམ་གླིང་དམག་ཆེན་དང་པོའི་དམག་འཁྲུག་ལ་ཞུགས་ནས་གྲོངས་པའི་དམག་ཞབས་འདས་པོ་༧༠༠༠་གྱི་ཕུང་པོ་ས་སྦས་བྱས་ཡོད་པ་དང་། དམག་གྲངས་མང་བའི་དུས་སུ་དབྱིན་ཇི་གཅིག་པུའི་དམག་༣༨༢༠༠༠༠་འཛམ་གླིང་དམག་ཆེན་དང་པོའི་འཐབ་འཁྲུག་ལ་ཞུགས་འདུག

འཛམ་གླིང་དམག་ཆེན་དང་པོ་ནི་ཡུ་རོབ་རྒྱལ་ཁབ་ཁག་ལ་དམག་འཁྲུག་གི་མཇུག་འབྲས་དང་སྡུག་བསྔལ། འགྲོ་བ་མིའི་ཀླ་ཀློའི་གཤིས་སྤྱོད་ཕྱི་ལ་བསྟན་པ་དང་དེ་ལ་གཏན་དུ་དོགས་ཟོན་དང་བཀག་འགོག་བྱ་དགོས་པའི་ལོ་རྒྱུས་ཀྱི་སློབ་གསོ་ཆེན་པོ་ཞིག་ཡིན་རུང་༡༩༣༨་ལོར་སླར་ཡང་ཡུ་རོབ་གླིང་ནས་འགོ་ཚུགས་ཏེ་འཛམ་གླིང་དམག་ཆེན་གཉིས་པ་ལངས། ད་ལྟ་འཛམ་གླིང་དམག་ཆེན་དང་པོ་མཇུག་བསྒྲིལ་ནས་ལོ་༡༠༠་ཐམ་པ་འཁོར་པའི་དུས་དྲན་ལ་སྲུང་བརྩི་ཞུ་བཞིན་ཡོད་ཀྱང་ཨ་མི་རི་ཀ་དང་ཡུ་རོབ་རྒྱལ་ཁབ་ཁག་ལ་སླར་ཡང་མི་རིགས་རིང་ལུགས་ཀྱི་ལྟ་བ་ཤུགས་ཆེ་རུ་སོང་སྟེ་འཛམ་གླིང་དམག་ཆེན་དང་པོའི་སྔོན་དེར་ཡུ་རོབ་རྒྱལ་ཁབ་ཁག་ལ་རྒྱ་སྐྱེད་རིང་ལུགས་ཀྱི་ལྟ་བ་ཞིག་དར་པ་བསྐྱར་ལོག་རྒྱག་གི་ཡོད་པའི་རྣམ་པ་ཞིག་མངོན་ཡོད་པ་སྟེ། ཨ་མི་རི་ཀ་ཨང་དང་པོ་དང་ཨི་ཊི་ལི་ཨང་དང་པོ། ཧང་གྷ་རི་ཨང་དང་པོ་ཞེས་ཡུ་རོབ་མཉམ་འབྲེལ་དང་མཉམ་འབྲེལ་རྒྱལ་ཚོགས་ཀྱི་སྒྲིག་འཛུགས་སོགས་རྒྱལ་སྤྱིའི་མཉམ་འབྲེལ་གྱི་ཚོགས་སྡེ་ཁག་ལ་སྡང་ཟུག་བྱ་རྒྱུ་ཤུགས་ཆེ་རུ་སོང་སྟེ་ཨ་མི་རི་ཀ་གཙོས་ཡུ་རོབ་རྒྱལ་ཁབ་ཁག་ལ་མི་རིགས་རིང་ལུགས་ཀྱི་ལྟ་བར་གསོན་སྟོབས་རྒྱས་བཞིན་ཡོད་ཅིང་། ལྷག་པར་དུ་ཨ་རིའི་སྲིད་འཛིན་ཌོ་ནལ་ཊམ་གྱིས་སྐྱེ་བོ་གང་ཞིག་མི་རིགས་རིང་ལུགས་པ་ཡིན་ན་སྐྱོན་ཞིག་མ་རེད་ཅེས་བཤད་འདུག

དབྱིན་ཇིའི་ཨོཀ་སི་ཧྥོར་ཌི་སློབ་གྲྭ་ཆེན་མོའི་ལོ་རྒྱུས་ཉམས་ཞིབ་པ་མེཀ་མཱི་ལན་གྱིས་བཤད་པ་ལྟར་ན་ང་ཚོ་ནུབ་ཕྱོགས་སུ་བཞི་བདེ་བརྟན་ལྷིང་ངང་དུ་འཚོ་གནས་བྱ་རྒྱུ་བྱུང་བ་བསོད་ནམས་ཆེ། ང་ཚོར་ཞི་བདེ་བརྟན་ལྷིང་བྱུང་ནས་དུས་ཡུན་རིང་པོ་ཕྱིན་ཡོད། ཡིན་ནའང་སྐབས་འགར་མི་ཚོས་ཞི་བདེ་ཞེས་པ་དེ་འབད་མེད་ལྷུང་གྲུབ་དང་དེ་ནི་རང་བཞིན་གྱི་ཡོད་པ་ཞིག་ཡིན་པའི་འདུ་ཤེས་འཆང་གི་འདུག ང་ཚོས་དམག་འཁྲུག་ཟེར་རྒྱུ་ཞིག་ལང་རྒྱུ་ཡོད་པ་དང་ལངས་མྱོང་ཡོད་པ། འགྲོ་བ་མིའི་ལོ་རྒྱུས་སུ་ཁྲག་དྲི་བྲོ་བའི་མི་གསོད་ཁྲག་སྦྱོར་བྱུང་བ་དྲན་སློང་བྱ་དགོས་ཀྱིན་འདུག དམག་འཁྲུག་ནི་རྒྱུ་མཚན་ཡང་དག་མེད་པར་ལང་གི་ཡོད་ཅེས་བཤད། གཟའ་ཉི་མ་འདིར་ཧྥ་རན་སིའི་སྲིད་འཛིན་གྱིས་རྒྱལ་ས་ཕེ་རི་སིའི་འདུ་འཛོམས་སྐབས་སུ་འཛམ་གླིང་དམག་ཆེན་དང་པོ་མཇུག་བསྒྲིལ་གྱི་གྲོས་མཐུན་ལ་བཀོད་པའི་ཁས་ལེན་དམ་བཅའ་ཁག་གི་འབྲུ་དོན་རྣམས་སླར་ཡང་འབྲེལ་ཡོད་རྒྱལ་ཁབ་ཁག་གི་འགོ་ཁྲིད་ཚོས་རྩ་འཛིན་བྱ་རྒྱུའི་ཆོད་སེམས་འཛུགས་རྒྱུ། གཟའ་མཇུག་འདིར་དབྱིན་ཇི་དང་ཧྥ་རན་སི། འཇར་མན་ཎི་སོགས་འཛམ་གླིང་དམག་ཆེན་དང་པོ་སློང་མཁན་གཙོ་གྲས་ཁག་གི་འགོ་ཁྲིད་ཚོ་ཕན་ཚུན་འཚམས་འདྲིར་ཕེབས་ནས་དུས་དྲན་སྲུང་བརྩི་ཞུ་རྒྱུའི་གྲ་སྒྲིག་བྱེད་ཀྱི་ཡོད་པ་རེད།།

XS
SM
MD
LG