ཉེ་ཆར་ཨ་རིའི་རིག་མཛོད་ཅེས་པའི་མིང་གྲགས་ཅན་གྱི་ཞིབ་འཇུག་སྡེ་ཚན་གྱིས་གསར་དུ་བཏོན་པའི་སྙན་ཐོག་ཞིག་ཏུ་ཨ་རིའི་སྲིད་འཛིན་ཌོ་ནལ་ཊོམ་དང་ཐེ་ཝན་གྱི་སྲིད་འཛིན་ཚེ་དབྱིན་ཝེན་གཉིས་དངོས་སུ་ཐུག་འཕྲད་བྱ་དགོས་ཞེས་བཀོད་འདུག སྙན་ཐོ་འདི་ཉེ་ཆར་ཨ་རིའི་སྲིད་འཛིན་ཌོ་ནལ་ཊོམ་གྱིས་ཐེ་ཝན་དང་ཨ་རིའི་མཐོ་རིམ་གཞུང་འབྲེལ་མི་སྣ་ཚོ་ཕན་ཚུན་འགྲོ་སྐྱོད་བྱེད་ཆོག་པའི་བཅའ་ཁྲིམས་ཤིག་ལ་མཚན་རྟགས་བཀོད་དེ། ཨ་རི་དང་ཐེ་ཝན་གྱི་འབྲེལ་ལམ་ཡར་རྒྱས་གཏོང་བའི་ཁྲིམས་ཀྱི་རྨང་གཞི་ཞིག་བཏིངས་པའི་རྗེས་སུ་སྤེལ་ཡོད། སྙན་ཐོ་དེ་ཨ་རིའི་ཕྱི་སྲིད་དྲུང་ཆེ་གཞོན་པ་ཟུར་པ་སྟེ། ཨ་རིའི་རིག་མཛོད་ཅེས་པའི་ཞིབ་འཇུག་སྡེ་ཚན་གྱི་འགན་འཛིན་རི་ཆར་ཌི་ཨར་མཱི་ཊེ་ཇི་སོགས་གནད་ཡོད་ཞིབ་འཇུག་པ་ཁག་ཅིག་གིས་བཏོན་པ་དང་། ཁོ་ཚོས་ཨ་རི་དང་ཐེ་ཝན་ཕྱོགས་གཉིས་ཀྱི་དམངས་གཙོ་དང་ཁྲིམས་འཛིན། འགྲོ་བ་མིའི་ཐོབ་ཐང་། རང་དབང་གི་ཁྲོམ་ར་སོགས་ཀྱི་རིན་ཐང་མང་པོ་ཞིག་མཉམ་སྤྱོད་བྱས་ན་འོས་ཤིང་འཚམས་རུང་། རྒྱ་ནག་གིས་དམངས་གཙོའི་ལམ་ལུགས་དར་པའི་ཐེ་ཝན་ལ་འཇིགས་སྐུལ་བྱེད་ཀྱི་ཡོད་པ་འདིས་ཨ་རི་དང་ཐེ་ཝན་གྱི་འབྲེལ་ལམ་ལ་ཤུགས་རྐྱེན་ཆེན་པོ་ཐེབས་ཀྱིན་འདུག ད་ལྟའི་བར་དུ་རྒྱ་ནག་གིས་ཐེ་ཝན་ལ་འཛིན་པའི་སྲིད་ཇུས་དང་བྱ་སྤྱོད་སོགས་ཕྱོགས་གང་ཐད་དུ་ཐེ་ཝན་གཞུང་ལ་གནོན་ཤུགས་སྤྲོད་རྒྱུ་དང་འཇིགས་སྐུལ་བྱ་རྒྱུ་སྔར་ལས་ཤུགས་ཆེ་རུ་འགྲོ་བཞིན་པ་མངོན་གསལ་རེད། འདི་ནི་ཐེ་ཝན་ལ་མཚོན་ན་ཡུན་རིང་གི་ཉེན་ཁ་ཞིག་ཡིན་པས་ཨ་རིས་ཐེ་ཝན་གྱི་དམངས་གཙོ་སོགས་ལས་དོན་གལ་ཆེན་གྱི་རིགས་ལ་ཁ་ཡོད་ལག་ཡོད་ཀྱི་རྒྱབ་སྐྱོར་བྱ་དགོས། ཉེ་ཆར་ཨ་རིའི་སྲིད་གཞུང་གིས་བཏོན་པའི་རྒྱལ་ཁབ་བདེ་འཇགས་ཀྱི་འཐབ་ཇུས་ཁོངས་སུ་ཐེ་ཝན་དང་དུས་ཡུན་རིང་པོར་མཉམ་འབྲེལ་བྱ་དགོས་ཞེས་འཁོད་པ་ནི་ཕྱོགས་གཉིས་ཀྱི་འབྲེལ་ལམ་ཡར་རྒྱས་གཏོང་བའི་གོ་སྐབས་ཡག་པོ་ཞིག་ཡིན་ཞེས་འཁོད་ཡོད་པ་རེད། སྙ་ཐོ་དེའི་བསམ་འཆར་གཙོ་བོ་མཚོན་པའི་སྲིད་ཇུས་དོན་ཚན་བདུན་འཁོད་ཡོད་པ་རྣམས་ནི་ཨ་རིའི་གཞུང་གིས་ཐེ་ཝན་ལ་འབྲེལ་ལམ་ཡར་རྒྱས་གཏོང་ཐབས་སུ་བརྟག་ཞིབ་བྱེད་མཁན་ཞིབ་འཇུག་ཚོགས་ཆུང་ཞིག་འཛུགས་རྒྱུ། སྲིད་འཛིན་ཌོ་ནལ་ཊོམ་དང་ཚེ་དབྱིན་ཝེན་གཉིས་གཙོས་ཕྱོགས་གཉིས་ཀྱི་མཐོ་རིམ་གཞུང་འབྲེལ་དཔོན་རིགས་ཁག་ཕན་ཚུན་ངོ་ཐུག་ནས་གྲོས་མོལ་བྱ་རྒྱུ། ཨ་རི་དང་ཐེ་ཝན་གཉིས་ཀྱིས་རང་དབང་ཚོང་ལས་ཀྱི་གན་རྒྱ་འཇོག་པར་གྲོས་མོལ་བྱ་རྒྱུ། ཐེ་ཝན་གྱི་རྒྱལ་སྲུང་ལ་རོགས་རམ་བྱས་ནས་མཚོན་ཆ་བཙོང་ཕྱོགས་ལ་རྒྱ་ནག་གི་འགོ་ཁྲིད་ཚོར་གྲོས་མོལ་བྱ་མི་དགོས་པ། ཐེ་ཝན་དང་ཨ་མི་རི་ཀས་མཉམ་འབྲེལ་དམག་སྦྱོང་བྱ་རྒྱུ། ཨ་རི་དང་ཐེ་ཝན་གཉིས་ཀྱིས་ཕན་ཚུན་རིག་གནས་སྤེལ་རེས་དང་ཕྱོགས་གཉིས་ཀྱི་རྒྱལ་སྲུང་ལས་དོན་ལ་མཉམ་འབྲེལ་བྱ་དགོས་པ་སོགས་འཁོད་འདུག ཡིན་ནའང་ཞིབ་འཇུག་པ་ཁ་ཤས་ཀྱིས་ཨ་རིས་ཐེ་ཝན་ལ་འབྲེལ་ལམ་ཡར་རྒྱས་སུ་གཏོང་དུས་གཟབ་ནན་ཆེན་པོ་བྱ་དགོས། པེ་ཅིང་གཞུང་ལ་དགོས་པ་མེད་པར་ཁ་གཏད་བཅགས་ན་ཐེ་ཝན་གྱི་བདེ་འཇགས་ལ་ལྡོག་ཕྱོགས་ཀྱི་གནོད་སྐྱོན་འཕོག་སྲིད་ཅེས་བཀོད་མོད། ཡིན་ནའང་ཨ་རིའི་ཁེ་ལི་ཧྥོར་ཎི་ཡ་སློབ་ཆེན་གྱི་ཨ་རྒྱ་སློབ་གླིང་གི་རྒྱལ་སྤྱིའི་འབྲེལ་ལམ་རིག་པའི་སློབ་དཔོན་གཞོན་པ་ཌེ་ནེལ་ལིན་ཆཱིས་ཨ་རིའི་སྲིད་འཛིན་ཌོ་ནལ་ཊོམ་གྱིས་ཨ་རི་དང་ཐེ་ཝན་གྱི་མཐོ་རིམ་དཔོན་རིགས་ཁག་ཕན་ཚུན་འགྲོ་སྐྱོད་བྱེད་ཆོག་པའི་བཅའ་ཁྲིམས་ལ་མིང་རྟགས་བཀོད་པ་དེས་ཐེ་ཝན་གྱི་བདེ་འཇགས་སྲུང་སྐྱོབ་ལ་ཕན་ཐོགས་མེད་པར་མཚོ་གླིང་དེའི་སྲུང་སྐྱོབ་ནུས་པ་ཉམས་དམས་སུ་བཏང་བ་རེད་ཅེས་སྐྱོན་བརྗོད་བྱས་འདུག
གཟའ་མིག་དམར། ༢༠༢༤/༠༤/༡༦