༄༅།། རྒྱ་གར་ལྷོ་ཕྱོགས་ཀྱི་བྷེ་ལ་ཀོ་པི་གཞིས་ཆགས་སུ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་མཆོག་གིས་ཤེས་རིག་ལས་ཁུངས་ཀྱི་ཟབ་སྦྱོང་ལ་ཞུགས་པའི་དགེ་རྒན་རྣམས་པ་དང་བོད་ནས་གསར་དུ་འབྱོར་པའི་མི་༧༠༠་ལྷག་ལ་བཀའ་སློབ་གནང་ཡོད་པ་མ་ཟད། ༧གོང་ས་མཆོག་བྱེས་ཀྱི་གདན་ས་ཆེན་པོ་བཀྲ་ཤིས་ལྷུན་པོ་དང་དཔལ་ཡུལ་ཐེག་མཆོག་རྣམ་གྲོལ་གླིང་། ད་དུང་བཙུན་དགོན་མཚོ་རྒྱལ་བཤད་སྒྲུབ་དར་རྒྱས་གླིང་བཅས་ལའང་ཆིབས་སྒྱུར་མཛད་ཡོད་ཅིང་། ད་ལོའི་རྒྱ་གར་ལྷོ་ཕྱོགས་བྷེ་ལ་ལ་ཀོ་པི་གཞིས་ཆགས་ཀྱི་ཆིབས་སྒྱུར་མཛད་རིམ་ཁག་གྲ་སྒྲིག་ལེགས་པོ་དང་རྒྱས་པོ། གང་ཐད་དུ་ཕུན་སུམ་ཚོགས་པ་ཞིག་བྱུང་སོང་ཞེས་ཆིབས་སྒྱུར་གྲ་སྒྲིག་ཚོགས་ཆུང་གྲས་སུ་ཡོད་པའི་ལུགས་ཟུང་བསམ་གྲུབ་གླིང་གཞིས་ཆགས་ཀྱི་གཞིས་འགོ་དགེ་ལེགས་འབྱུང་གནས་ལགས་ཀྱིས་བཤད་པ་དང་། ༧གོང་ས་མཆོག་གིས་གཞིས་འགོ་རྣམ་པར་གཞིས་ཆགས་ཀྱི་ཁུག་ཁུག་དཀྱོག་དཀྱོག་གི་གསིང་དུ་ལུས་ཡོད་པའི་ཉམ་ཐག་མགོན་མེད་སྐྱབས་མེད་རྣམས་ལ་ལྟ་སྐྱོང་ཡག་པོ་བྱ་དགོས་ཞེས་ལམ་སྟོན་བཀའ་སློབ་གནང་ཡོད་པའི་གནས་ཚུལ་ཞིབ་ཕྲ་རྣམས་བསོད་ནམས་དབྱངས་འཛོམས་ལགས་ཀྱིས་སྙན་སྒྲོན་ཞུ་ཡི་རེད།།
གཟའ་སྤེན་པ། ༢༠༢༤/༠༤/༢༠
