སྔ་དྲོའི་རླུང་འཕྲིན།༢༠༢༠་ཟླ་༡༠་ཚེས་༡༨

བོད་ཀྱི་ཆབ་སྲིད་བཙོན་པ་ཟུར་པ་སྟག་སྣ་འཇིགས་མེད་བཟང་པོ་ལགས་ཁ་སང་སྤྱི་ཟླ་བཅུ་བའི་ཚེས་བཅུ་བདུན་ཉིན་སུ་བས་སུ་རུ་དགོངས་པ་རྫོགས་པའི་ཡིད་སྐྱོའི་གནས་ཚུལ་བྱུང་ཡོད་པ། ཨ་རིའི་ཕྱི་སྲིད་ལྷན་ཁང་སོགས་ནས་ཨ་རིའི་སློབ་གྲྭ་ཆེ་འབྲིང་ཆུང་གསུམ་ཁག་གི་ནང་དུ་ཡོད་པའི་རྒྱ་ནག་གི་ཁུང་ཙི་སློབ་གླིང་དག་གིས་ཤུགས་རྐྱེན་ངན་པ་ཐེབས་ཀྱི་ཡོད་པའི་ཐད་ཉེན་བརྡ་བཏང་ཡོད་པ། ནིག་ཙི་ལན་ཊི་ཡི་ལས་ཐོག་སྲིད་བློན་ལ་རྒྱལ་ཡོངས་འོས་བསྡུ་ཆེན་མོའི་ནང་ཡང་བསྐྱར་རྒྱལ་ཁབ་ཐོབ་ཡོད་པ། ད་ལོར་རྒྱ་ནག་ཝུའུ་ཧན་ནས་ཁྱབ་ཡོང་བའི་ཏོག་དབྱིབས་རིམས་ནད་ལ་རྐྱེན་བྱས་ཏེ་འཛམ་གླིང་གི་ཡུལ་སྐོར་གནས་ཡུལ་མིང་གྲགས་ཅན་དག་གི་ཡུལ་མིའི་འཚོ་བའི་གནས་སྟངས་ལ་ཤུགས་རྐྱེན་ཆེན་པོ་ཐེབས་ཡོད་པ་སོགས་ཀྱི་གནས་ཚུལ་ཡོད།