༄༅།། ཟླ་བ་འདིའི་ཕྱི་ཚེས་༡༡་སྟེ། རེས་གཟའ་མིག་དམར་ཉིན་ཨ་མི་རི་ཀའི་གྲོས་ཚོགས་གོང་མས་བོད་ལ་འགྲོ་སྐྱོད་འདྲ་མཉམ་གྱི་ཐོབ་ཐང་ཞེས་པའི་ཁྲིམས་འཆར་དེར་རྒྱབ་སྐྱོར་གྱི་གྲོས་ཆོད་བཞག་ཡོད་ཅིང་། ཁ་སྔོན་ཕྱི་ཟླ་༩་ནང་དུ་ཁྲིམས་འཆར་དེར་ཨ་རིའི་གྲོས་ཚོགས་འོག་མས་རྒྱབ་སྐྱོར་གྱི་གྲོས་ཆོད་བཞག་ཡོད་རེད།།
གཟའ་འཁོར་འདིའི་ལས་རིམ་ལ་བོད་མིའི་སྒྲིག་འཛུགས་ཀྱི་བྱང་ཨ་རིའི་སྐུ་ཚབ་དོན་གཅོད་དངོས་སྒྲུབ་ཚེ་རིང་དང་རྒྱལ་སྤྱིའི་བོད་དོན་ལས་འགུལ་ཁང་གི་དམིགས་བསམ་ལས་འཆར་འགན་འཛིན་བསྟན་ཆོས་རྒྱ་མཚོ་རྣམ་གཉིས་ལ་ཨ་རིའི་གྲོས་ཚོགས་ཀྱིས་ཁྲིམས་འཆར་དེ་གཏན་འབེབས་བྱུང་བ་དེའི་གལ་གནད་སོགས་ལ་གླེང་མོལ་ཞུ་ཡི་ཡིན།།