ཐེ་ཝན་རྒྱལ་ཡོངས་ལ་ཁྱོན་བསྡོམས་སློབ་གྲྭ་ཆེན་མོ་༡༥༧་ཡོད་པ་དང་། སློབ་ཆེན་དེ་དག་གི་ཁོངས་ནས་སློབ་ཆེན་༨༠་ཐམ་པས་རྒྱ་ནག་གི་སློབ་ཆེན་ཁག་ལ་གྲོས་མཐུན་བཞག་སྟེ། རྒྱ་ནག་སྐམ་ས་ཆེན་མོའི་སློབ་ཕྲུག་ཚོར་ཐེ་ཝན་གྱི་སློབ་ཆེན་དེ་དག་གིས་ཆབ་སྲིད་སློབ་ཁྲིད་མི་བྱེད་པ་དང་། མཚོ་གླིང་དེའི་བདག་དབང་ལ་རྒྱ་ནག་གིས་འཛིན་པའི་གཞུང་འབྲེལ་ལངས་ཕྱོགས་ལ་དགག་སྒྲུབ་མི་བྱེད་པ། མདོར་ཐེ་ཝན་རྒྱ་ནག་གི་མངའ་ཁོངས་ཡིན་པའི་པེ་ཅིང་གི་ལྟ་ཚུལ་ལ་ཐེ་ཝན་གྱི་སློབ་ཆེན་ཁག་ཅིག་གིས་མོས་མཐུན་བྱས་ཡོད་ཅིང་། རྒྱ་ནག་གི་སློབ་ཕྲུག་འབུམ་ཕྲག་མང་པོ་ཕྱི་རྒྱལ་ཡུལ་གྲུ་ཁག་ལ་སློབ་གཉེར་བྱེད་དུ་བསྐྱོད་ཀྱི་ཡོད་པ་དང་། རྒྱ་ནག་གི་སློབ་ཕྲུག་མང་པོ་ཞིག་ཐེ་ཝན་གྱི་སློབ་ཆེན་ཁག་ལའང་སློབ་གཉེར་དུ་སོང་སྟེ། ཉེ་བའི་ལོ་ཤས་ཤིག་ནས་ཐེ་ཝན་གྱི་སློབ་ཆེན་ཁག་ལ་རང་གི་མཚོ་གླིང་དེའི་སློབ་ཕྲུག་དང་ཕྱི་རྒྱལ་གྱི་སློབ་ཕྲུག་ཇེ་ཉུང་དུ་འགྲོ་བཞིན་པ་དེར་རྒྱ་ནག་སྐམ་ས་ཆེན་མོ་ནས་སློབ་ཕྲུག་བླངས་ནས་ཁ་གསབ་བྱེད་ཀྱི་ཡོད་པ་དང་། དེར་བརྟེན་རྒྱ་ནག་གཞུང་གིས་རང་གི་ཕྱིར་གཏོང་སློབ་མའི་དཔུང་ཚོགས་བརྒྱུད་ནས་གུང་ཁྲན་ཏང་གི་སྲིད་ཆབ་ཀྱི་ལྟ་བ་དང་ལངས་ཕྱོགས། རྒྱ་ནག་གི་སྤྱི་ཚོགས་རིང་ལུགས་རྣམས་ཐེ་ཝན་ལ་ཁྱབ་གདལ་གཏོང་གི་ཡོད་པ་རེད།
