ངོ་འཕྲད་བདེ་བའི་དྲ་འབྲེལ།

ཁམས་ནགས་ཤོད་འབྲི་རུ་རྫོང་གི་བོད་མི་ཕ་བུ་གཉིས་ལ་རྒྱ་གཞུང་ཉེན་རྟོག་པས་དོན་ མེད་རྡུང་རྡེག་བཏང་ནས་རྨས་སྐྱོན་ཚབས་ཆེན་བཟོས་སྟབས། ད་ལྟ་ལྷ་སའི་བོད་ལྗོངས་མི་མང་སྨན་ཁང་ཟེར་བར་སྨན་བཅོས་བྱེད་བཞིན་ཡོད་འདུག

བོད་མིའི་སྒྲིག་འཛུགས་ཀྱི་དྲྭ་གནས་སོགས་སུ་བཀོད་པ་ལྟར་ན། ཟླ་འདིའི་ཚེས་ ༧ ཉིན་གྱི་བོད་ནང་གི་མཚན་མོའི་ཆུ་ཚོད་ ༡༡ ཡས་མས་སུ། འབྲི་རུ་རྫོང་ཁོངས་ནས་ཡིན་པའི་བོད་མི་རང་ལོ་ ༥༣ ཅན་རྣམ་རྒྱལ་བསྟན་འཛིན་ཟེར་བ་ཞིག་དང་། སེམས་ཁམས་བདེ་བོ་མེད་པའི་ཁོང་གི་བུ་པད་ཚེ་གཉིས་ལ། སུ་ཡིན་གསལ་བོ་མི་ཤེས་པའི་རྒྱ་མིའི་ཉེན་རྟོག་མི་སྣ་གཉིས་ཀྱིས་སྐད་ཆ་གང་ཡང་མ་བཤད་པར་དོན་མེད་རྡུང་རྡེག་བཏང་སྟེ། མགོ་ལུས་གང་སར་རྨ་ཁ་མང་པོ་བཟོས་ནས་ལུས་ཡོངས་སུ་ཁྲག་གིས་ཁེངས་ཡོད་པ་མ་ཟད། རྣམ་རྒྱལ་བསྟན་འཛིན་ལགས་ཀྱི་རྒྱབ་རུས་བཅག་པ་དང་། མགོ་བོ། མཁལ་མ་སོགས་ཀྱང་བསྣད་ཡོད་ཟེར།།

ཁྱིམ་མི་གཉེན་འབྲེལ་ཚོས་གནས་ཚུལ་ཤེས་རྟོགས་བྱུང་རྗེས་ཁོང་གཉིས་འབྲི་རུ་རྫོང་སྨན་ཁང་དུ་བསྐྱལ་བ་དང་། རྣམ་རྒྱལ་བསྟན་འཛིན་ལགས་ལ་རྨས་སྐྱོན་ཚབས་ཆེན་བཟོས་ཡོད་སྟབས། ཕྱི་ཚེས་ ༨ ཉིན་གྱི་ཞོགས་པའི་ཆུ་ཚོད་ ༦ པ་ཡས་མས་སུ་ནག་ཆུ་མི་མང་སྨན་ཁང་དུ་ཕྱིན་ཡོད་ཀྱང་། སྨན་ཁང་གིས་གང་མགྱོགས་ལྷ་སར་མ་སོང་ན་སྲོག་ཉེན་ཡོད་སྐོར་བརྗོད་ཡོད་པར་བརྟེན་ལྷ་སར་འགྲོ་དགོས་ཁེལ་ཏེ། ད་ལྟ་ཁོང་གཉིས་ལ་བོད་ལྗོངས་མི་མང་སྨན་ཁང་དུ་སྨན་བཅོས་བྱེད་བཞིན་ཡོད། སྨན་ཁང་གིས་བརྟག་དཔྱད་བྱས་པ་བརྒྱུད། རྣམ་རྒྱལ་བསྟན་འཛིན་ལགས་ཀྱི་རྒྱབ་རུས་ཤིག་བཅག་པ་དང་མཁལ་མ་སྐྲངས་བ། ཁྲག་གཅིན་འབབ་པ། མགོ་ལུས་གང་སར་རྨ་ཁ་དང་སྐྲང་འབུར་གྱིས་ཁེངས་ཏེ་གནས་སྟངས་ཚབས་ཆེན་ཡིན་སྐོར་འགྲེལ་བརྗོད་བྱས་ཡོད་འདུག

ཁྱིམ་མི་ཚོས་རྡུང་རྡེག་གཏོང་མཁན་དེ་གཉིས་འབྲི་རུ་རྫོང་ཉེན་རྟོག་ཁང་གི་མི་སྣ་ཡིན་པའི་དོགས་གཞི་འོག རྣམ་རྒྱལ་བསྟན་འཛིན་ལགས་ཀྱི་བུ་མོ་དང་མོའི་ཁྱོ་ག་སོགས་མི་འགའ་རྫོང་ཉེན་རྟོག་ཁང་དུ་སོང་སྟེ་རྒྱུ་མཚན་རྩད་གཅོད་བྱས་སྐབས་ཉེན་རྟོག་པས་ཁོས་ང་ཚོར་རྒྱུག་ཁྱི་ལབ་པ་མ་ཟད། ཧམ་པ་ཆེན་པོས་དཔའ་ཡོད་ན་ཤོག་ཅེས་ཤོར་ཤོར་བྱས་ནས་རྫིག་ཉམས་བསྟན་སོང་ཞེས་ཉེས་འཛུགས་བྱས་ཡོད་འདུག

སྤྱིར་ནགས་ཤོད་འབྲི་རུའི་ཡུལ་དུ་ ༢༠༡༣ ལོའི་ཟླ་བ་ ༩ པའི་ནང་ས་གནས་ཡུལ་མིས་རྒྱ་ནག་གི་རྒྱལ་དར་རྒྱལ་མོ་རྔུལ་ཆུར་གཡུགས་པའི་ཉིན་མོ་ནས་བཟུང་སྟེ། ད་བར་ཟླ་བ་ ༡༩ ཙམ་སོང་བའི་རིང་ས་གནས་སུ་ཚད་མཐོའི་དམ་དྲག་བྱེད་བཞིན་ཡོད་པ་རེད།།

XS
SM
MD
LG