ངོ་འཕྲད་བདེ་བའི་དྲ་འབྲེལ།

རྨེའུ་བཟོད་པའི་འཕྲིན་སྟེགས་ཞེས་པའི་སྒེར་གྱི་ཟིན་བྲིས་སུ་རང་དབང་གི་ཆེད་དུ་ལག་པ་གནམ་ལ་འཕྱར་བ་དང་དཔའ་མོ་སོགས་རྩོམ་འབྲི་མཁན་མདོ་སྨད་རྔ་བའི་རྨེའུ་བཟོད་པ་ལགས་འཛིན་བཟུང་བཀག་ཉར་བྱས་པའི་ཐད་རྒྱ་གར་རྒྱལ་ས་ལྡི་ལི་ནས་རྨེའུ་དཀོན་རྒྱམ་ལགས་གདན་འདྲེན་ཞུས་ནས་བགྲོ་གླེང་ཞུས་པ་ཡིན།།

ཟླ་འདིའི་ཕྱི་ཚེས་ ༢༧ ཉིན་རྔ་བ་རྨེའུ་རུ་མ་ནས་ཡིན་པའི་རྩོམ་པ་པོ་རྨེའུ་བཟོད་པ་ལགས། རྒྱ་གཞུང་ཉེན་རྟོག་པས་ལམ་བར་ནས་འཇུ་བཟུང་འཁྲིད་ཀྱིས། ད་ལྟའི་ཆར་གར་ཡོད་གནས་སྟངས་ཤེས་རྟོགས་ཐུབ་ཀྱི་མེད་འདུག

རྨེའུ་དཀོན་རྒྱམ་ལགས་ཀྱིས་གསུངས་པ་ལྟར་ན། ཕྱི་ལོ་ ༢༠༡༤ ཟླ་ ༡༢ ཚེས་ ༢༧ ཉིན་གྱི་བོད་ནང་གི་ཕྱི་དྲོའི་ཆུ་ཚོད་བཞི་ལྔ་ཡས་མས་སུ། རྩོམ་པ་པོ་རྨེའུ་བཟོད་པ་ལགས་རྨེའུ་རུ་མའི་ཡུལ་ཚོ་ནས་རྔ་བ་རྫོང་ཐོག་ཏུ་རླངས་འཁོར་ཞིག་ལ་བསྡད་དེ་འགྲོ་བཞིན་པའི་ལམ་བར་ནས། རྔ་བ་རྫོང་གི་བདེ་འཇགས་ལས་ཁུངས་དང་ཉེན་རྟོག་མི་སྣ་མཉམ་རུབ་ཐོག རྫིག་རྔམས་དྲག་པོའི་སྒོ་ནས་ཁོང་འཇུ་བཟུང་བྱས་ཡོད་པ་མ་ཟད་ཁོང་གི་ཅ་དངོས་རྣམས་ཀྱང་བཙན་འཁྱེར་བྱས་ཡོད་འདུག

རྩོམ་པ་པོ་རྨེའུ་བཟོད་པ་ལགས་བཙན་ཁྲིད་བྱེད་དགོས་དོན་རྒྱུ་མཚན་ཁ་གསལ་ཤེས་རྟོགས་བྱུང་མེད་ནའང་། ས་གནས་ཡུལ་མི་རྣམས་ཀྱིས་ཚོད་དཔག་བྱས་པ་ལྟར་ན། ཁོང་གིས་སྐད་འཕྲིན་ནང་༼རྨེའུ་བཟོད་པའི་འཕྲིན་སྟེགས་༽ཟེར་བའི་སྒེར་ངོས་ཟིན་བྲིས་ཤིག་གཉེར་ནས། རང་དང་གཞན་གྱིས་བྲིས་པའི་བོད་ནང་གི་རང་ལུས་མེར་སྲེག་ངོ་རྒོལ་དང་། བོད་མིའི་རང་དབང་དང་བོད་དོན་འཐབ་རྩོད་སོགས་དང་འབྲེལ་བའི་རྩོམ་ཡིག་མང་པོ་ཞིག་སྔ་ཕྱིར་བརྒྱུད་སྤེལ་བྱས་དང་བྱེད་བཞིན་པ་མ་ཟད། ལྷག་པར་སྒེར་གཉེར་ཟིན་བྲིས་དེའི་ནང་དུ་༼རང་དབང་གི་ཆེད་དུ་ལག་པ་གནམ་ལ་ཕྱར་བ། ༽ཞེས་པ་དང་། ཕྱི་ཟླ་༡༢་ཚེས་༢༣་ཉིན་རང་ལུས་མེར་སྲེག་གནང་མཁན་ཚེ་པེ་སྐྱིད་ལགས་ཀྱི་བློས་གཏོང་དང་ཆོད་སེམས་ཀྱི་སྐོར་ལ་ཁོང་གིས་རྒྱ་ཡིག་ཐོག་བྲིས་པའི་༼དཔའ་མོ།༽ཞེས་པ་སོགས་ཀྱི་རྩོམ་ཡིག་སྤེལ་བའི་རྐྱེན་མིན་འགྲོ་སྙམ་པའི་སེམས་འཚབ་བྱེད་བཞིན་ཡོད་འདུག

XS
SM
MD
LG