བོད་ཡིག་བྱིས་པའི་དྲ་ཚིགས་༼གཡག་རྒོད་༽ཅེས་པ་གསར་གཏོད་གནང་མཁན། ད་ལྟ་ཁཱེ་ན་ཌའི་ས་གནས་ན་གཞོན་སློབ་སྟོན་པའི་མཚན་གནས་ཡོད་མཁན་དང་ཁཱེ་ན་ཌའི་ཡུལ་མི་ན་གཞོན་ཚོའི་ལམ་སྟོན་སློབ་གསོ་བ་མཁས་གྲུབ་ལགས་ཀྱིས་ www.wildyaks.com/༼གཡག་རྒོད་༽ཅེས་པའི་བྱིས་སྒྲུང་དྲ་ཚིགས་གསར་གཏོད་དང་དེ་བཞིན་གཡག་རྒོད་བོད་ཀྱི་བྱིས་པའི་སློབ་གསོ་ཁང་གསར་དུ་སྒོ་འབྱེད་བྱེད་ཡོད། མཁས་གྲུབ་ལགས་ཀྱིས་བརྗོད་ན།བོད་ཕྱི་ནང་གཉིས་སུ་བོད་ཀྱི་བྱིས་པའི་སློབ་གསོ་ཐད་ལ་ཕྱག་ལས་གནང་མཁན་གྱི་བོད་མི་སློབ་གསོ་བ་ཧ་ཅང་གིས་ཉུང་ལ། ལྷག་དོན་དུ་བོད་རང་གི་སྐད་ཡིག་གི་ནང་དུ། བྱིས་པའི་སེམས་ཁམས་དང་མཐུན་པའི་འགུལ་རིས་དང་། བྱིས་སྒྲུང་། བྱིས་གཞས། བྱིས་པའི་རྩེད་ཆས་སོགས་ཧ་ཅང་གིས་ཉུང་ཉུང་ཡིན་ཕྱིར། ཁོང་གིས་དམངས་ཁྲོད་ཀྱི་བྱིས་སྒྲུང་བསྡུ་སྒྲིག་སོགས་ཀྱིས། བོད་ཀྱི་བྱིས་པ་ཚོར་བོད་ཀྱི་བྱིས་པའི་སེམས་ཁམས་དང་མཐུན་པའི་འཇིག་རྟེན་ཞིག་བོད་སྐད་ཡིག་གི་ནང་ནས་སྤྲོད་ཐུབ་པར་ནུས་པ་འདོན་གྱིན་པར་བརྗོད་སོང་།