༡༩༨༧ ལོར་བོད་ཀྱི་རྒྱལ་ས་ལྷ་སའི་ནང་དགེ་འདུན་པས་སྣེ་ཁྲིད་དེ་ལས་འགུལ་རིམ་པརབྱུང་རྗེས་ ༡༩༨༩ ཕྱི་ཟླ་ ༣ ཚེས་ ༧ གྱི་མཚན་དགུང་ནས་ལྷ་སའི་ནང་དྲག་པོའི་ཁྲིམས་གཞི་གསལ་བསྒྲགས་བྱས་ཡོད་པ་དང་། བོད་དོན་དབྱེ་ཞིབ་པ་ཚོས་དུས་དེ་ནས་བཟུང་འདས་པའི་ལོ་སུམ་ཅུ་ཙམ་གྱི་རིང་རྒྱ་ནག་གཞུང་གིས་བོད་ནང་དམ་བསྒྲགས་ཆེ་བའི་སྲིད་བྱུས་རིམ་པར་ལག་བསྟར་བྱས་ཏེ། བོད་ཀྱི་དཀའ་རྙོག་སེལ་ཐབས་ལ་དོན་དངོས་དང་འཚམས་པའི་གོམ་པ་སྤོ་ཐབས་མ་བྱས་པར་བོད་ཀྱི་ཆོས་རིག་དང་སྐད་ཡིག མི་རིགས་བཅས་རྩ་གཏོར་གཏོང་ཐབས་ཀྱི་སྲིད་བྱུས་ལག་བསྟར་བྱས་ཡོད་པར་ངོས་འཛིན་བྱེད་ཀྱི་ཡོད་པ་དང་། གནས་སྟངས་དེ་ལ་བརྟེན་ནས་འདས་པའི་ལོ་གཉིས་ཙམ་གྱི་ནང་བོད་མི་བརྒྱ་ལྷག་གིས་རང་སྲེག་གི་ལས་འགུལ་སྤེལ་ནས་རྒྱ་ནག་གཞུང་ལ་ངོ་རྒོལ་བྱས་ཡོད་པ་རེད། དེ་རིང་གི་བགྲོ་གླེང་ལེ་ཚན་ནང་དུ་བཞུགས་སྒར་དྷ་རམ་ས་ལ་ནས་བོད་གནས་དབྱེ་ཞིབ་པ་སྤྱི་འཐུས་འབའ་སྐལ་བཟང་རྒྱལ་མཚན་ལགས་དང་འདི་ག་རླུང་འཕྲིན་ཁང་དུ་བྱང་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུན་པ་ཀུན་དགའ་བཀྲ་ཤིས་ལགས་གཉིས་གདན་འདྲེན་ཞུས་ནས་ ༡༩༨༩ ལོར་ལྷ་སའི་ནང་དྲག་པོའི་ཁྲིམས་གཞི་གསལ་བསྒྲགས་བྱས་པ་ནས་ད་ལྟ་བོད་ནང་རང་ལུས་མེར་བསྲེགས་གཏོང་བའི་གནས་ཚུལ་མུ་མཐུད་ཡོང་བཞིན་པའི་བར་རྒྱ་ནག་གཞུང་གིས་བོད་ལ་འཛིན་པའི་སྲིད་བྱུས་ཀྱི་བརྒྱུད་རིམ་ལ་བསྐྱར་ཞིབ་དང་བགྲོ་གླེང་ཞུ་རྒྱུ་ཡིན།