རྒྱ་གར་གྱི་རྒྱལ་ས་ལྡི་ལིར་གནས་སྡོད་གནང་མཁན་ཐུབ་བསྟན་སྐལ་བཟང་གྲགས་པ་ལགས་ནི་བོད་མི་ན་གཞོན་སྒྱུ་རྩལ་པ་ཚོ་ཕན་ཚུན་འབྲེལ་བ་དང་འདུ་འཛོམས་ཀྱི་ལས་གཞི་སྤེལ་སའི་བོད་ཀྱི་སྒྱུ་རྩལ་མཐུན་ཚོགས་གསར་འཛུགས་གནང་མཁན་ཞིག་ཡིན་ཞིང་། ཁོང་གིས་རིག་གཞུང་ནི་རྟག་ཏུ་འཕེལ་ཤུགས་ལྡན་པ་ཞིག་ཡིན་དགོས་པ་ལས་སོར་གནས་ཅན་ཞིག་མིན། རིག་གཞུང་ནི་ཡུལ་དུས་ཀྱི་འཕོ་འགྱུར་ལ་གཞིགས་ཏེ་འཕེལ་རྒྱས་འགྲོ་དགོས་ཤིག་རེད་ཅེས་གསུངས་བྱུང་། གཤམ་ལ་ཁོང་གིས་སྒྱུ་རྩལ་མཐུན་ཚོགས་དང་ད་ལྟའི་བོད་ཀྱི་རིག་གཞུང་གི་གནས་སྟངས། མ་འོངས་པའི་འཆར་གཞི་སོགས་ཀྱི་ཐད་བཀའ་མོལ་ཞུས་པ་དེ་གཟིགས་རོགས།