རེས་གཟའ་ཉི་མའི་ཉིན་བོད་ཀྱི་ས་ཁུལ་མདོ་སྨད་བླ་བྲང་བཀྲ་ཤིས་འཁྱིལ་གྱི་ལྷ་སྡེ་རྒན་རྒྱ་ཡུལ་ཚོའི་རི་སྔོན་སྡེ་བ་ནས་ཡིན་པ་གནམ་ལྷ་ཚེ་རིང་གིས་རང་ལུས་མེར་བསྲེགས་བཏང་ནས་རྒྱ་ནག་གཞུང་ལ་ངོ་རྒོལ་བྱས་རྗེས་འདས་གྲོངས་སོང་འདུག་པ་དང་།
ལོ་ན་༤༩ ལ་སོན་པ་གནམ་ལྷ་ཚེ་རིང་ལགས་ཀྱིས་ད་རིང་བོད་ཀྱི་དུས་ཚོད་ཕྱི་དྲོ་ཆུ་ཚོད་ལྔ་བ་དང་དྲུག་པའི་བར་བསང་ཆུ་རྫོང་ཁོངས་བླ་བྲང་གྲོང་ཁྱེར་གྱི་གློག་བརྙན་ཁང་ཆེན་མོའི་མདུན་ནས་རང་ལུས་མེར་བསྲེགས་བཏང་ནས་རྒྱ་ནག་གཞུང་ལ་ངོ་རྒོལ་གྱི་སྐད་འབོད་བྱས་འདུག
སྐུ་བཤེགས་གནམ་ལྷ་ཚེ་རིང་ལགས་ཀྱིས་རང་ལུས་མེར་བསྲེགས་བཏང་བའི་དུས་ཚོད་ལོ་གསར་སྐབས་འཁེལ་བར་བརྟེན་སྲང་ལམ་དུ་བོད་མི་ཧ་ཅང་ཉུང་ཉུང་ལས་མེད་པས་ཁོང་གི་སྐུ་ཕུང་ལམ་གསེང་ཁྱེར་མཁན་བོད་མི་བྱུང་མེད་པར་བརྟེན་ཉེན་རྟོག་པ་ཡོང་ནས་ཁོང་གི་སྐུ་ཕུང་དང་འཕྲུལ་རྟ་སོགས་ཁྱེར་ཡོད་འདུག
ཁོང་ལ་ཤུལ་ལུས་ཕྲུ་གུ་བྱིས་པ་བཞི་ཡོད་པ་དང་ཕྲུ་གུ་བཞི་ནས་ཆེ་ཤོས་དེ་གྲ་པ་ཡིན་འདུག ཁོང་ནི་བོད་ཀྱི་ལོ་གསར་གྱི་དུས་ཡུན་ལ་བོད་ནང་རང་ལུས་མེར་བསྲེགས་བཏང་ནས་རྒྱ་ནག་གཞུང་ལ་ངོ་རྒོལ་གནང་མཁན་གསུམ་པ་དེ་ཡིན་པ་རེད།
བླ་བྲང་དུ་རྒྱ་ནག་གཞུང་ལ་རང་སྲེག་ངོ་རྒོལ།