དེ་རིང་ཕྱི་ཟླ་༨ཚེས་༡༤་སྟེ། གཟའ་མིག་དམར་ཉིན་བོད་ཀྱི་མདོ་སྨད་རེབ་གོང་ས་ཁུལ། སེང་གེ་གཤོང་མ་མགོ་གྲོང་ཚོའི་སྐྱེས་པ་བཞི་ལ་རྫོང་གི་ཉེན་རྟོག་པ་ཆང་འཐུང་ར་བཟི་འགའ་ཞིག་གིས་ཉེས་རྡུང་ཚད་མེད་བཏང་སྟེ་རྨས་སྐྱོན་ཕོག་པ་དང་། དེར་བརྟེན་སེངྒེ་གཤོང་གྲོང་ཚོ་སོ་སོའི་སྐྱེས་པ་༢༠༠་ལྷག་གིས་སྲིད་གཞུང་གི་སྤྱི་བདེ་མི་སྣས་མི་དམངས་ཉེས་རྡུང་གཏོང་མི་ཆོག་ཅེས་ཡིག་ཆེན་བྲིས་པའི་འཕྲེད་དར་འཕྱར་ཐུང་རེན་རྫོང་མི་དམངས་སྤྱི་བདེ་ལས་ཁང་མདུན་དུ་ངོ་རྒོལ་སྐད་འབོད་བྱས་པ་དང་། རིམ་བཞིན་རེབ་གོང་ས་ཁུལ་གྱི་གྲོང་ཚོ་གཞན་ཁག་གི་སེར་སྐྱ་མི་མང་གིས་ཀྱང་སེངྒེ་གཤོང་མི་མང་གི་ངོ་རྒོལ་ལས་འགུལ་དེར་རྒྱབ་སྐྱོར་བྱས་ཏེ། མཐར་མི་གྲངས་༧༠༠་ཡས་མས་ཤིག་འདུ་འཛོམས་བྱུང་ཞིང་། ཐུང་རེན་རྫོང་གི་འབྲེལ་ཡོད་གཞུང་འབྲེལ་ལས་སྣེ་ཚོས་ཉི་མ་གཉིས་གསུམ་ཞིག་གི་ནང་ཚུད་དུ་གནད་དོན་དེར་ཐག་གཅོད་བྱ་རྒྱུའི་ཁས་ལེན་བྱས་ཏེ་མི་མང་གི་ངོ་རྒོལ་སྐད་འབོད་མཚམས་བཞག་ཀྱང་། གལ་སྲིད་རྨ་ལྷོ་བོད་རིགས་རང་སྐྱོང་ཁུལ་དང་ཐུང་རེན་རྫོང་གིས་འབྲེལ་ཡོད་ལས་སྣེ་ཚོས་གནད་དོན་དེར་ཐག་གཅོད་དྲང་པོ་ཞིག་མ་བྱས་ཚེ། སེངྒེ་གཤོང་མི་མང་གིས་སླར་ཡང་ངོ་རྒོལ་ཁྲོམ་སྐོར་བྱ་རྒྱུའི་ཉེན་བརྡ་བཏང་ཡོད་པ་དང་། ད་ཐེངས་ཀྱི་ངོ་རྒོལ་སྐབས་སུ་རྒན་རྒོན་ཚོས་ན་གཞོན་ཚོར་ཞི་བའི་སྒོ་ནས་ངོ་རྒོལ་སྐད་འབོད་བྱེད་དགོས་པ་ལས། ཉེན་རྟོག་པར་རྒོལ་འཛིང་བྱས་ན་ང་ཚོར་དྲག་གནོན་བྱས་ཏེ་ཕམ་ཉེས་བྱུང་རྒྱུའི་ཉེན་ཀ་ཡོད་ཅེ་འབོད་སྐུལ་ཞུས་པ་དང་ཁ་ཏ་བྱས་པའི་གནས་ཚུལ་ཐོན་ཡོད་པའི་སྐོར། འཕྲིན་ལས་ཆོས་སྒྲོན་གྱིས་གསར་འགྱུར་མཁོ་སྤྲོད་པ་ཞིག་ལ་བཅར་འདྲི་ཞུས་པའི་གནས་ཚུལ་དེར་གསན་རོགས་གནང་།
རེབ་གོང་སེངྒེ་གཤོང་མི་མང་གི་རྒྱ་གཞུང་ལ་ངོ་རྒོལ