ངོ་འཕྲད་བདེ་བའི་དྲ་འབྲེལ།

གཟའ་ཕུར་བུ། ༢༠༢༤/༠༣/༢༨

དབྱིན་ཇིའི་གྲོས་ཚོགས་འཐུས་མི་ཚོས་བོད་དོན་གླེང་སློང་།


ཕྱི་ཟླ་༢་ཚེས་༡༧་ཉིན་ཀན་ལྷོ་བོད་རིགས་རང་སྐྱོང་ཁུལ། བླ་བྲང་བསང་ཆུ་རྫོང་གི་རྒན་གྱའི་རི་སྔོན་གྱི་བུ་ཕྲུག་བཞིའི་ཕ་སྟེ། རང་ལོ་༤༩་ལ་སོན་པའི་གནམ་ལྷ་ཚེ་རིང་ཞེས་པ་ཞིག་གིས་རང་ལུས་མེར་སྲེག་བཏང་བ་དང་། དེའི་གོང་གི་ཕྱི་ཚེས་༡༣་ཉིན་ཀན་ལྷོ་བོད་རིགས་རང་ཁུལ། གཙོས་གྲོང་ཁྱེར་གྱི་ཁོངས་སུ་ཡོད་པའི་ཀླུ་ཤོད་སྐྱི་ནང་སྡེ་བའི་འབྲུག་པ་མཁར་ཟེར་པ་ཞིག་དང་། ཡང་ཉིན་དེར་བལ་ཡུལ་གྱི་མཆོད་རྟེན་ཆེན་པོ་བྱ་རུ་ཁ་ཤོར་གྱི་སྐོར་ལམ་ནང་དུ་སྒྲུབ་ཆེན་ཚེ་རིང་ཞེས་པ་ཞིག་གིས་རང་ལུས་མེར་སྲེག་བཏང་བ་བརྩིས་ཚེ། ད་བར་བོད་ཕྱི་ནང་གཉིས་སུ་མི་བརྒྱ་ལྷག་གིས་རང་ལུས་མེར་སྲེག་བཏང་ནས་རྒྱ་ནག་གི་དབང་སྒྱུར་ལ་ངོ་རྒོལ་ལ་ངོ་རྒོལ་དང་། ཁོང་ཚོ་མང་ཆེ་བས་བོད་ཀྱི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་བོད་ལ་ཆིབས་སྒྱུར་གནང་དུ་འཇུག་དགོས་པ་དང་བོད་ལ་རང་དབང་དགོས། བོད་པ་ཚོ་མཐུན་སྒྲིལ་རྡོག་རྩ་གཅིག་སྒྲིལ་གྱིས་ཞེས་སྐད་འབོད་བྱས་ཡོད་པ་རེད། དེར་བརྟེན་དབྱིན་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ་ཚོས་གསར་འགོད་གསལ་བསྒྲས་སྤེལ་ཏེ། རྒྱ་ནག་གཞུང་གིས་བོད་ལ་འཛིན་པའི་སྲིད་ཇུས་ཁུངས་མ་འཁྱོལ་པ་དེར་བསྐྱར་ཞིབ་བྱེད་དགོས་པ་དང་། ད་བར་བོད་པ་བརྒྱ་ལྷག་གིས་རང་ལུས་མེར་སྲེག་བཏང་བ་རྒྱ་ནག་གི་གདུག་རྩུབ་ཅན་གྱི་སྲིད་ཇུས་དེར་ཐུག་ཡོད་པ་མ་ཟད། བོད་ཀྱི་ས་གནས་མང་དག་ཅིག་ལ་བོད་པ་ཚོས་རྒྱ་ནག་གི་དབང་སྒྱུར་ལ་ཞི་བའི་ངོ་རྒོལ་བྱེད་ཀྱི་ཡོད་པའི་རྒྱུ་རྐྱེན་ཡང་རྒྱ་ནག་གི་བཙན་དྲག་སྲིད་ཇུས་ལ་ཐུག་ཡོད། རྒྱ་ནག་གཞུང་གིས་ངེས་པར་དུ་བོད་མི་མང་གི་འགྲོ་བ་མིའི་ཐོབ་ཐང་དང་སྤྱི་དམངས་ཀྱི་རང་དབང་ཐོབ་ཐང་ལ་བརྩི་འཇོག་བྱེད་རྒྱུ། བོད་མི་དམངས་ལ་གཏམ་བརྗོད་རང་དབང་དང་བོད་པའི་ཐུན་མོང་མ་ཡིན་པའི་རིག་གཞུང་གཅེས་འཛིན་བྱེད་པའི་ཆོག་རང་དབང་སྤྲོད་དགོས། འགྲོ་བ་མི་སྤྱི་མཚུངས་ལ་ཡོད་པའི་བསམ་བློའི་རང་དབང་དང་ཆོས་དད་རང་དབང་གི་བོད་མི་དམངས་ལའང་ཡོད་དགོས། རྒྱ་ནག་གཞུང་གིས་འཕྲལ་དུ་བོད་མི་མང་གི་སྡུག་བསྔལ་ཅི་ཡིན་ཞིབ་འཇུག་བྱས་ཏེ། བོད་མི་དམངས་ཀྱི་ངོ་ཚབ་མཚོན་པའི་འབྲེལ་ཡོད་མི་སྣ་ཚོར་གྲོས་མོལ་རྒྱུ། ཕྱི་རྒྱལ་གྱི་གསར་འགོད་པ་དང་མི་ཆོས་རིང་ལུགས་ཀྱི་རོགས་ཚོགས་ཁག རྒྱལ་སྤྱིའི་རྟོག་ཞིབ་པ་ཚོར་བཀག་འགོག་མེད་པར་བོད་ལ་འགྲོ་སྐྱོད་ཆོག་པའི་རང་དབང་སྤྲོད་དགོས་ཞེས་ནན་བརྗོད་བྱས་ཡོད་པ་རེད།།
ཐད་ཀར་ཕབ་ལེན་གྱི་དྲ་འབྲེལ།
XS
SM
MD
LG